Komunidade Domingas Maria da Costa, hatete, durante semana ida ona atu trata dokumemtus hanesan Sertidaun Nasimentu no Billete Identidade, maibé prosesu atendementu ba komunidade sira loron ida atende de'it ema na'in-60.

"Sira nia atendementu 60 orang de'it to'o lokaraik, labele, tuir ami nia haree 60 orang ne'e labele", dehan nia iha resintu edifisiu konservatóriu notariadu Baukau, Segunda (16/01).

Husu parte relevante liu-liu Ministéru Justiça (MJ) atu haree no rezolve problema atendementu iha servisu konservatóriu notariadu Baukau, tanba loron ida tomak mak atende de'it ema na'in-60 difikulta ba ema seluk ne'ebé husi Postu Admimistrativu sira dook, hanesan, Baguia, Laga, Kelikai, Venilale inklui Vemase.

"Ami la'os mai husi Baukau kota, ami mai husi Kelikai, Baguia, Laga balun mai husi Dili no Uatilari Vikeke, ami selu karreta, di'ak liu simu hotu tiha de'it", nia informa

Enkuantu, komunidade Domingos Rosario, husi Postu Administrativu Baguia, rekomenda, atu Governu orenta pesoal servisu konservatóriu notariadu Munisípal, atu to'o iha baze hodi fó atendementu ba komunidade sira kona-ba Sertidaun Nasimenu no Billete Identidade, tanba trata dokumentus iha edifisiu servisu konservatóriu notariadu Munisípal difisil oituan, tanba ema barak susar atu loron ida atende liu ema na'in-100.

"Ha'u mai besik atu fulan ida ona, maibé seidauk hetan kartaun ruma, tanba ema barak, dala ruma ami forma iha madrugada tuku:05, maibé ema seguránsa hili ema ne'ebé mak ferik katuas liu ona, mais sira simu 60 orang de'it, entaun ami barak mak tenke fila, dader mai fali tán mós nune'e de'it",  nia hatete

Atendementu ne'e, fó situasaun triste ba komunidade husi fatin dook, tanba husi loron Segunda-feira to'o Sesta-feira tenke lakon servisu iha uma, maibé laiha rejultadu.

Hatan ba prekupasaun ne'e, Diretór konservatóriu servisu notáriadu Baukau, Marcelino Gama, hatete, atendementu loron ida atende de'it ema na'in-60, tanba menus rekursu umanu. Alende mós prezisa verifika dokumentus sira ne'ebé komunidade sira hatama iha sistema.

"Ita fó limitasaun, primeiru ita haree rekursu umanu, ita forsa ki'ik liu, maibé atendementu volúme boot liu, ita atende dala ruma la konsege", nia hatete

Tanba, atende ema na'in-ida atu trata dokumentus hanesan Sertidaun Nasimentu, prezisa liuhusi verifikasaun, hafoin hatama ba livru asentu mak prosesa ba sistema, no kontinua ba halo print test, foin halo koreksaun, ikus liu mak foin print orijínal, tanba ne'e fó limitasaun ba atendentu.

"Maibé ikus ne'e, ha'u aumenta ona atendementu sa'e ba 100, maibé hanesan ita obriga de'it", nia argumenta

Husu ba komunidade hotu atu pasiensia ba atendementu iha servisu notariadu nian, tanba servisu hotu prosesu ho sistema.

Entretantu pesoal ne'ebé servisu iha konservatóriu notáriadu Baukau hamutuk ema na'in-10, dadaun apoiu husi pesoal kontratadu na'in-4 husi servisu autoridade Munisípal. (*)