Tuir gomunikadu ne'ebé www.tempotimor.com asesu iha pájina Governu katak, Lei númeru 10/2005, 10 fulan-agostu, estabelese rejime jurídiku ba feriadu data ofisiál komemorasaun no loron toleransia de pontu ne'ebé altera husi lei númeru 3/2016, 25 fulan-maiu, ne'ebé promove alterasaun balun ho sentidu atu rekoñese loron ka data istóriku luta ba libertasaun.
Feriadu Nasionál ne'ebé Governu deside mak loron 1 fulan-janeiru nu'udar loron nasionál ba tinan foun no mós Ano Novo (feriado de data fixa), 3 fulan-marsu ba loron Veteranos (feriado de data fixa), loron 7 fulan-abríl nu'udar loron Sesta feira Santa, inklui mós iha loron 22 fulan-abríl ba Idul Fitri ba relijiaun musulmanu.
Loron dahuluk fulan-maiu nu'udar loron mundiál ba traballadór sira, ne'ebé fixu ona, nune'e mós iha loron 20 fulan hanesan ba restauransaun independensia fixu, loron 8 fulan-juñu loron Corpo de Deus (feriado de data variável), loron 29 loron Idul Adha ba relijiaun musulmanu no mós loron 30 fulan-agostu nu'udar loron Konsulta Populár iha Timor-Leste.
Fulan-novembru feriadu nasionál hamutuk haat hanesan iha loron dahuluk nu'udar loron ba santu sira, iha loron daruak finadu, no loron 12 nu'udar loron Juventude Nasional ka loron Masakre Santa Kruz no mós loron 28 fulan-novembru nu'udar loron Proklamasaun Unilateral data fixa.
Loron 07 fulan-dezembru nu'udar loron memoria ka invazaun Indonézia, iha loron tuir mai nu'udar loron Señora da Imaculada Conceição, padroeira de Timor-Leste, nune'e mós iha loron 25 loron Natál no loron 31 nu'udar loron Erois Nasionál nian. (*)