"Hakarak mós komenta kona-ba Unidade Polísia Fronteira (UPF) sira ne'ebé destaka loos iha área fronteira sira ne'e mak garante hela soberania fronteira iha Timor Leste nian liu liu iha Oecusse postu ida bele destaka de'it polísia ida, enkuantu ema Indonesia nian postu ida ema liu 10 ka 20 ba leten ita nia ema ida de'it no nia hein postu ne'e to'o loron 10 ba leten", dehan nia iha Parlamentu Nasionál, Segunda (16/01).

Komandante sira presiza tau atensaun, tanba membru ida de'it mak hein postu ida durante loron 10 ba leten, ne'e fo sira nia vida iha risku nia laran hodi asegura fronteira.

"Mais infelizmente iha postu ida iha de'it ema na'in ida", nia lamenta.

Alende ne’e, husu mós ba Deputadu sira iha Parlamentu Nasionál liu-liu komisaun B ne'ebé trata assuntu seguransa bainhira halo fiskaliza iha postu sira labele fo hatene antes, maibé ba derepente de'it hodi observa direta postu sira iha fronteira ho Indonézia.

"Di'ak liu lalika aviza, tun diretamente derepente de'it para ita boot sira detekta", nia hatutan.

Tanba, bainhira aviza antes, komandante sira halo ona preparasaun ne'ebé maka'as hodi simu deputadu sira. (*)