"Ha'u mai informa polítika Ministériu Justisa nian ba Primeiru Minístru kona-ba planu iha mandadu ikus liu-liu atu kontinua fahe sertifikadu rai ba sidadaun hotu, maibé prioridade liu ba ema kbiit laek faluk no oan kiak sira no veteranu sira", dehan nia hafoin sorumutu ho Primeiru Ministru, Taur Matan Ruak iha Palásiu Governu, kinta (12/01).
Polítika Ministériu Justisa nian mós iha tempu badak sei ba sukat hodi atribui sertifikadu rai ba sira hotu, no rai ne'ebé atu atribui, la'os iha Munisípiu Dili, maibé iha territóriu Timor laran tomak.
Tanba, objetivu husi atribuisaun atu regulariza situasaun jurídika kona-ba rai estadu nian iha Timor-Leste, tanba iha ona lei ne'ebé atu regulariza.
"Hahú husi Primeiru Governu konstitusionál to'o iha oitavu governu primeira lejislatura to'o iha kinta lejislatura, iha leis normál lei númeru 01/2003 iha dekretu lei ne'ebé iha oitavu Governu atu regulariza situasaun rai no ba estadu sira ne'e, nia baze iha hotu ona", nia hatutan.
Tanba, atribuisaun rai mós kontribui osan ba kofre estadu, ezemplu konkreta iha tinan 2002, liuhusi arendamentu rai iha Timor laran tomak, Ministériu Justisa konsege rekolla reseita hamutuk tokon US$4.
"Tanba ne'e, importante tebes husi arendamentu ne'e, parte ida fo reseita barak ba estadu, entaun ida ne'e mak ami bele halo", nia informa.
Alende ne’e, Ministru Justisa mós sei atribui rai ida ba Sekretaria Estadu Protesaun Sivil (SEPS) hodi hala’o kna’ar proteje komunidade sira bainhira hasoru dezastre ruma kada Munisípiu.
"Identifika ona rai balun iha Dili, maibé instituisaun balun mak uza fali, tanba ne'e ami husu atu tur hamutuk mak indentifika rai no uma estadu iha ne'ebé Ministériu Justisa atribui ba sira la'ós iha Dili de'it, maibé mós iha Munisípiu 14”, dehan nia
"Munisípiu Ataúru ita atribui ba atu harii edifisiu hodi hala'o sira nia kna’ar ho di'ak liu tan", nia afirma.
Nune’e, Ministériu Justisa fo oportunidade ba Sekretaria Estadu Protesaun Sivil atu identifika rasik sira nia fatin, hafoin Ministériu Justisa halo levantamentu no identifikasaun hodi atribui ba sira. (*)