Tempotimor (Dili)-Sekretária Estadu Formasaun Profisionál no Empregu (SEFOPE) liu-husi Diresaun Nasionál Empregu Exteriór (DNEE) prepara tán Timoroan na’in-49 atu aranka ba servisu iha Australia.

Tanba, tuir informasaun ne’ebé www.tempotimor.com, asesu iha pájina SEFOPE-Diresaun Nasional Empregu Exterior katak, loron ohin, kuarta 11 fulan-janeiru tinan 2023, DNEE Bekora realiza tán PDB (Pre- Departure Breafing), ba kandidatu traballadór na’in 49, kompostu husi Mane 21 no Feto 28 ne’ebé atu ba servisu iha Australia.

Diretór DNEE, Filomeno Soares hatete, realizasaun programa PDB (Pre- Departure Breafing), ba kandidatu traballadór sira bazeia ba kritéria ne’ebé empregadór husi Australia fó, no faze ida ne’e atu hanorin traballadór sira kona-ba, lei, kultura, no disiplina servisu iha Australia.

Nune’e, husu ba joven timoroan na’in-49, ne’ebé hetan ona oportunidade atu ba servisu iha Australia, hatudu komportamentu servisu di’ak respeita ema nia lei, no servisu mantein iha sistema, hodi bele hetan konfiansa nafatin husi empregadór.

Nia mós husu atu ba servisu labele halai ses husi sistema, tanba halai ses ona husi sistema empregadór sira iha Australia konsidera ita hanesan traballadór lokál, la’os ona hanesan traballadór imigrantes,  nune’e ita hasoru problema ruma governu la iha ona responsabilidade atu rezolve.

Diretór ne’e mós apela ba joven timoroan hotu ne’ebé hetan oportunidade ba servisu iha Australia, atu labele pratika fali artemarsias no arterituais iha ema nia rain, tanba ba servisu la’os hanesan pesoál, maibé reprezenta nasaun no povu Timor-Leste. (*)