Tuir informasaun ne’ebé www.tempotimor.com asesu iha pájina SEFOPE-Diresaun Nasional Empregu Exterior, iha loron tersa 10 fulan-janeiru tinan 2023, Sekretária Estadu Formasaun Profisionál no Empregu (SEFOPE), Alarico do Rosario akompaña husi Diretór Jerál, Diretór Nasionál sira, hala’o ona enkontru hó Embaixadór Japaun mai Timor-Leste, Kimura Tetsuya hó ekipa delegasaun iha salaun SEFOPE, Kaikoli, Dili, hodi ko’alia kona-bá atu haruka joven Timoroan ba servisu.
Nune’e, SEFOPE, Alarico do Rosario agradese ba Embaixadór Japaun mai Timor-Leste hó ekipa delegasaun husi Japaun ne’ebé iha komitmentu mai to’o iha Timor-Leste hodi ko’alia oinsá atu haruka joven timoroan ba hala’o estajiu hodi hetán mós servisu, hodi bele hadi’a ekonomía família no nasaun.
Nune’e, Governu Japaun ho empregadór komprimitidu atu simu joven timoroan sira ba hala’o estajiu no bele hetán servisu iha Japaun, tanba ne’e, tempu badak sei asina mós Memorandum Intendimentu.
Tempu badak governu Japaun sei simu uluk traballadór timoroan na’in lima sai hanesan pilotu hodi ba hala’o estajiu no hetan servisu, karik hatudu komportamentu servisu di’ak, ba futuru governu japaun sei bele emprega barak liután joven timoroan sira.
Embaixadór Japaun mai Timor-Leste, Kimura Tetsuya mós hatete, área servisu ne’ebé governu Japaun sei oferese ba joven Timoroan sira mak área agrikultura, hodi sira bele hetán osan, esperensia no bele mós adapta-aan ba teknolojia iha Japaun. (*)