Nia mós fo orientasaun atu kontinua akompaña progresu konstrusaun ba estrada Munisipál husi Postu Administrativu Laga ba Baguia iha Munisípiu Baukau no husi área Uaiaka Postu Administrativu Kelikai ba Ossu entre munisípiu Baukau no Vikeke nian, ne'ebé antes ne'e lansa ona iha loron 09 fulan-Dezembru tinan 2022.

Tanba, tuir informasaun ne’ebé www.tempotimor.com asesu iha pájina Gabineti Ministru Obras Públika, katak, Ministru fo orientasaun ne’e bainhira hala’o enkontru ho Diretór Jerál no Nasionál sira iha salaun enkontru Gabinete MOP, Kaikoli, Dili, segunda (09/01).

Ministru mós orienta ona ekipa tékniku sira atu kontinua akompaña hodi aselera prosesu konstrusaun ba Estrada nasionál, munisipál, urbana, no dezeñu ba estrada no ponte sira ne'ebé prosesu daudaun la’o hela, inklui servisu emerjénsia sira ne'ebé seidauk finaliza.

Alende ne’e, Ministru mós husu ba DJEPKS liuhosi Diresaun Nasionál sira atualiza progresu ba estrada sira hanesan, estrada Postu Administrativu Maliana ba Munisípiu Bobonaru liga Postu Administrativu Atsabe, estrada husi Munisípiu Lautem ba Uatukarbau, Munisípiu Vikeke nian to'o Postu Natarbora, husi Munisípiu Ainaru (Sarae), Suku Hare-Kain, Postu Administrativu Zumalai, Aituto-Letefoho, Gleno-Letefoho no  Hatulia, Laklubar-Turiskain, Seloi-Gleno inklui estrada sira seluk.

Nune’e, Diresaun Jerál Habitasaun no Urbanízmu aprezenta progresu sira kona-ba konstrusaun ba Jardín sira ne'ebé tama ona iha planu sira no update mós kona-ba progresu sira ba habitasaun iha Suku Halidolar, Postu Administrativu Kristu-Rei, Munisípiu Dili nian ne'ebé prosesu daudaun la'o hela.

Reuniaun regulár ne'e, hetan partisipa husi Diretór Jerál Obras Públikas (DJOP), Rui Hernani Guterres ho nia Diretór Nasionál sira no PMU, Diretór Nasionál Aprovizionamentu (DNA), Deonisio Guterres inklui tékniku sira husi diresaun sira no tékniku Gabinete MOP. (*)