Print this page

Koñesimentu Timor-oan ba Lian Portuges Menus: Razaun Rekruta Asesor Internasional

By November 12, 2019 1610
Plenaria Parlamentu Nasional Plenaria Parlamentu Nasional Foto tempotimor.com

Tempotimor (Dili)-Maske Timor Leste obta lian Portuges nu’udar lian ofisial no Timor-oan barak mak koko atu aprende lian Portuges ne’e maibé to’o ohin loron koñesimentu Timor-ona ba lian Portuges ne’e sei menus. Ida ne’e mak sai razaun ba instituisaun estadu sira hodi rekruta asesor internasional.

Prezidente Parlamentu Nasionál, Arão Noe hatete, Timor-oan ninia koñesimentu di’ak ba lian portuges sei menus, tan ne’e presiza asesor husi estranjeiru, liu-liu kona-ba komunikasaun no lejislativu ne’ebé barak liu hakerek ho lian portuges.

"Tanba iha instituisaun sira atu hakerek relatoriu presiza asesor sira husi li’ur mak hakerek, maibé ba tan tinan lima ou sanolu oin mai bele iha ona Timor-oan sira par bele substitui," deklara Prezidente PN Arão Noe iha PN, Segunda (11/11/19).

Ideia atu kapasita Timor-oan, liu-liu iha lingua portuges, Arão dehan, hahú soe ona atu instituisaun hotu-hotu inklui PN tenke tau ona iha hanoin hodi haruka timor-oan ba portugal atu bele ba hasai kursu direitu, nune'e abanbainrua bele mai ezerse funsaun hanesan asesor sira hodi labele depende tan ba asesor husi rai li’ur.

"Ita-nia preokupasaun agora Timor-oan ne'ebé hatene lian portugues sei menus, entaun ita tenke rekruta duni asesor husi li’ur par instituisaun sira bele funsiona ho di’ak," dehan nia.

Kona-ba informasaun husi Ministra Finansas iterina ne’ebé deklara haruka ona lista asesor ba Parlamentu Nasionál, Arão Noe hatete, nia la hatene kona-ba lista refere.

"Ha’u la hatene lista ne'e, so komisaun sira mak bele hatene, tanba ha’u seidauk audensia ho ministériu sira hotu," dehan nia.

Molok ne’e, Primeiru Ministru Taur Matan Ruak deklara katak Timor Leste (TL) seidauk bele hamriik mesak bainhira laiha apoiu husi asesor internasional sira. Deklarasaun ida ne’e tuir akademista balun hatudu katak PM Taur minimiza kapasidade Timor-oan.

Xefe Governu Aliansa Mudansa ba Progresu (AMP) Taur Matan Ruak deklara TL sei presiza nafatin prezensa husi asesor internasional sira.

Nia dehan, kondisaun ida ne'e laos akontese de’it iha TL iha Timor Leste maibé mós iha nasaun sira seluk ne'ebé iha ona esperensia.

"Tuir ha’u-nia haree ita-nia nasaun seidauk bele hamrik sem apoiu asesor internasional, ne'e iha ne'ebé de’it", dehan Taur iha Palasiu Prezidensial Bairopite, Kinta (07/11/19).

PM Taur hatete, TL seidauk bele sees an husi prezensa asesor internasionál no PM rasik mós labele halakon asesor internasional sira.

"Tinan 17 ita seidauk sees aan (husi asesor), ne'e laos ha’u foin tama ne'e mak ha’u halakon, ida ne'e seidauk bele, Pais barak mezmu iha esperensia barak mós presiza", nia hatete.

Iha fatin ketak, estudante fakuldade Siensia Sosial no Politika, Universidade Nasional Timor Lorosa’e (UNTL), A. da Silva Ximenes deklara la satisfas ho deklarasaun PM Taur.

“PM ninia koalia ne’e hatudu momoos katak PM rasik la fiar nia aan no minimiza kapasidade Timor-oan sira nian,” dehan estudante ne’e.

Tuir nia, durante ne’e governu selu asesor internasional sira, liu-liu husi Portugal, ho osan boot maibé sira halo tan problema.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items