Tuir nia, bainhira governu haruka ona OJE ba PN signifika PN mak iha kompetensia atu haree.
Tan ne’e, nia afirma, nia la preokupa ho deklarasaun husi deputadu ida ka rua iha li’ur.
"Karik orsamentu ne'e sei iha governu entaun kompetensia governu, maibé mai ona iha parlamentu nasional ne'e kompetensia deputadu bankada sira nian," dehan Arão iha PN, Segunda (11/11/19).
Prezidente PN ne’e hatete, PN hanesan orgaun deliberative tan ne’e prosesu atu delibera hodi redus orsamentu ne’e PN ninia kompetensia.
“Redus orsamentu ka lae ne'e depende ba deputadu bankada mak deside iha plenaria,” deklara nia.
Kona-ba OJE 2020 ne’ebé balun konsidera boot demais, Arão dehan, nu’udar Prezidente PN nia serbisu mak atu lidera de’it plenaria.
“Ha’u hanesan ema ida mesak labele altera buat ida, Prezidente (PN) so hala'o nia serbisu atu lidera plenaria dei't, maibé atu aprova ka deside ba buat ruma ne'e iha deputadu bankada sira-nia Liman," katak nia.