Sekretáriu Estadu Kooperativa (SEKOOP), Elizário Ferreira, hatete, durante mandatu tinan rua ho balun (2/5) sei fokus liu ba formasaun no informasaun, tanba edukasaun mak sai ran ba instituisaun molok garante funsionamentu ho di'ak.
"Ha'u nia mandatu foku liu ba formasaun, tanba edukasaun sai baze iha instituisaun ida bainhira kontrolu internu forte, serbisu administrasaun públiku ne'e sei la'o di'ak, tanba iha funsionamentu estadu nian atu asegura Governasaun di'ak, iha buat rua dependente ba malu, membru Governu asegura polítika Governasaun nian, tékniku ka ezekutivu asegura ninia sustentabilidade instituisionál ne'e mak ema bolu dehan, memoria instituisionál", dehan nia iha Salaun NCBA Railaku Ermera, tersa (20/12).
Tékniku ezekutivu aseguradu mak hanesan diretor jerál, nasionál inklui xefe departamentu sira ne'ebé iha Instituisaun estadu nian.
"Asegura memoria ida ne'e, ema ne'ebé iha laran tenke iha koñesimentu kona-ba serbisu tékniku administrativu", nia afirma.
Nune'e, Diretór Gabinete Inspesaun Auditoria (GIA), Henrique de Oliveira Ximenes, hatete, formador sira sei aprezenta kona-ba baze legais administrasaun iha prosedimentu iha administrasaun públika nian kona-ba normál regulamentares ne'ebé relasiona ho aprovizionamentu simples, ho órgaun fiskalizador nian servisu hodi hala'o atividade internu ba iha administrasaun públiku liu-liu atividade ne'ebé liga ho servisu área kooperativa nian.
"Hanesan ba Cesta Bázika transferensia públikas subvensaun públikas, nune'e sei matéria prátika mós funsionalismu ninian atu bainhira formandu sira ne'ebé nu'udar funsionáriu públiku iha Sekretária Estadu Kooperativa atu hala'o ninia atividade kona-ba regulamentares ne'ebé Governasaun ida ne'e mak objetivu prinsipál ho relasaun área inspesaun auditoria investigasaun nian", dehan nia.
Partisipa ba formasaun ne’e, totál hamutuk ema na’in 20-resin no durasaun tempu semana ida, ne’ebé ho oradór mak hanesan, Komisaun Anti Korupsaun (KAK), Komisaun Funsaun Públiku (KFP), Provedór Direitu Umanu ba Justisa (PDHJ), Inspesun Jerál Estadu (IJE), Ministériu Finansas (MF) Ministériu Justisa (MJ). (*)
