"Sira (uma-ka'in) ne'ebé mak seidauk hetan sei halo prosesu para hetan", dehan Ministru Jerónimo hodi responde ba preokupasaun ne'ebe levanta husi deputadu sira iha plenária PN, segunda (19/12).

Tanba, dekretu lei husi governu kona-ba subsidiu iha fulan dezembru ne'e, sei fo ba sira-ne'ebé harii ona uma-kain antes fulan-fevereiru tinan 2022 no harii iha fulan-marsu 2022 mai leten mak sei la hetan.

"Tanba iha dekretu lei ne'e hatete kedas iha ne'eba eh nune'e orsamentu rasik mos ba iha ne'ebá, tanba ne'e sira ne'ebe harii uma-kain,  dadus mak karik iha ikus nian, entaun seidauk bele hetan, maibé sira-ne'ebe husi fulan-fevereiru 2022 ba kraik, nia iha direitu atu hetan", nia informa.

Maibé, kona-ba subsidiu ba PNTL ne'e, governu simu kazu iha semana kotuk no hakarak informa ba públiku mak sei la ko’alia kona-ba salariu báziku, maibé ko'alia mak valor remunerasaun ne'ebé PNTL simu iha fulan ida-ne'e.

"Se nia simu remunerasaun liuhusi US$500 ba leten maka nia laiha direitu atu hetan subsidiu uma-kain US$200 ba fin du anu nian, maibé nia remunerasaun ne'e mak nia simu husi US$500 mai kraik nia iha direitu atu hetan", nia esklarese.

Tanba ne'e, governu mós haree hela, tanba komandante jeral PNTL fo sai ona sirkular ida hodi avizu ba ajente sira la simu subsidiu fin du anu, tanba remunerasaun ne'ebe mak PNTL sira simu ne'e liuhusi US$500 ba leten.

"Ida-ne'e inklui ona subsidiu, ai-han no subsidiu saida de'it, maibé ninia remunerasaun total ne'ebé nia simu kada fulan liuhusi US$500 ba leten, se karik iha balun la to'o ami sei ko'alia para haree, se nia la to'o US$500 ba leten, simu remunerasaun fulan ida maka nia iha direitu atu hetan mos subsidiu", nia esplika.

Alende funsionáriu públiku balun ne'ebe simu ona saláriu ho ninia remunerasaun tomak fulan ida la to'o US$500 ne'e, nia iha direitu hetan subsídiu uma-kain US$200 no désimu terseiru mês ka gaji-13.

Tanba désimu terseiru ne'e, simu de'it saláriu báziku ba fulan dezembru 2022, sei la simu remunerasaun tomak.

Nia fo ezemplu se funsionáriu kuandu hetan saláriu báziku US$120, entaun nia sei simu de'it mak US$120 la inklui ho subsidiu ka remunerasaun ne'ebé sira simu kada fulan.

"Désimu terseiru mes agora mos inklui ita-nia asesor internasional no asesor nasional sira iha direitu atu hetan, depois de sira-nia salariu, maibé sira la simu salariu remunerasaun totál, eh sira simu de'it salariu báziku tuir funsaun públika, ne'ebe jeralmente determina katak simu US$1.220 dolár, kompara ho diretor jeral nomos administrador sira", nia salienta. (*)