Olinda: OJE 2020 Boot Luar Biasa, Haruka Fila ba Governu

Deputadu sira iha plenaria Parlamerntu Nasional Timor Leste Deputadu sira iha plenaria Parlamerntu Nasional Timor Leste Foto Especial

Tempotimor (Dili)-Deputada husi Bankada Klibur Haburas Unidade Timor-oan (KHUNTO) Olinda Guterres husu atu haruka fila fali Orsamentu Jeral Estadu (2020) ba governu tanba konsidera orsamentu ne’e boot demais.

 

Deputada ne’e dehan, governu Aliansa Mudansa ba Progresu (AMP) tenke hamenus OJE 2020 hafoin bele haruka fila fali ba Parlamentu Nasionál (PN).

 

Hanesan públiku hatene, governu AMP iha OJE 2020 aprezenta osan hamutuk billaun $1.95. Total OJE 2020 ne’e hamosu preokupasaun husi deputadu sira iha PN.

 

"Ami hare Orsamentu ne'e boot ida ne'ebe luar biasa tiha fali, orsamentu iha tinan uluk hamutuk $1.4 bilaun entaun foin dadauk ba fali iha konselu ministru hasa’e ba $1.6 biliaun maibé, derrepente sa’e tiha fali ba $1.95 bilaun no mai fali iha ne'e ami sura osan ne'e liu tiha fali $2 biliaun,” deklara deputada ne’e iha PN, Segunda (11/11/2019).

 

Aleinde montante osan ne’ebé boot, deputada Olinda mós preokupa kona-ba kapasidade ezekusaun tanba membru governu ne’ebé seidauk kompletu.

 

“Membru governu mós la kompletu ne'e atu ezekuta oinsa," deputada ne’e kestiona.

 

Tan ne’e, nia dehan, di’ak liu haruka fila fali OJE 2020 ba governu hodi hamenus hafoin bele haruka fali mai PN.

 

"Orsamentu ne'e di’ak liu haruka fali ba governu hodi hamenus tiha mak haruka fali mai parlamentu nasional," nia sujere.

 

Maske nune’e, kona-ba pozisaun ba OJE 2020, deputada ne’e dehan, nia parte seidauk simu orientasaun ruma atu vota kontra.

 

“Politika VIII governu nian, AMP hanesan uma ida depois dapur mak ketak-ketak,” dehan nia.

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com