Tempotimor (Dili)-Komisaun Nasionál ba Eleisaun (CNE) ho Sekretariadu Tékniku Administrasaun Eleitoral (STAE) preparadu ona atu organiza eleisaun parlamentár iha tinan 2023.

Deklarasaun ne'e hato'o husi Prezidente CNE, José Agusitinho Belo no Diretor Jerál Interinu Sekretáriu Tekniku Administraun, Leonardo Amaral hafoin finaliza audénsia ho Prezidente Repúblika, José Ramos Horta iha palásiu prezidensiál Nicolau Lobato Bairo Pite, sexta (15/12).

"Preparasaun ami-nia masímu ona, ami hein de'it bainhira mak Presidente Repúblika tuir konstituisaun iha kompetensia atu fó sai loron eleisaun nian ba orgaun eleitóral liu-liu ba CNE, preparadu ona para atu halo", dehan Prezidente CNE.

Maibé, haree ba preparasaun ida-ne'e, parte CNE sei buka hadi'a nafatin no saida mak di'ak ona presiza halo di'ak liutan, iha eleisaun parlamentár tinan 2023.

Nune'e parte CNE mos halo superviziona nafatin ba prosesu tomak, haree mos ba iha fulan-janeiru, sei kontinua eleitór sira ne’ebé atu troka sira-nia hela fatin, inklui mos ba estudante no joven sira ne’ebé hela iha estranjeiru, tenki muda fali sira nia dadus, nune'e labele lakon sira-nia direitu votu.

Normalmente durante ne'e parte CNE nia servisu hotu la'o di'ak, hanesan ho eleisaun prezidensiál, iha kestaun téknika sira sei diskute, tanba atu hetan kualidade diskusaun.

Direitor Interinu STAE, Leonardo Amaral, hatete, Prezidenti Repúblika, José Ramos Horta bolu STAE ho CNE ba dala tolu ona no ohin audiénsia kona-ba asuntu rua, dahuluk mak postu operasuonal ba eleisaun 2023 no ida seluk mak preparasaun tékniku ba Eleisaun Parlamentár 2023.

"Liga ho STAE prontu ona, maibé hein de'it Prezidenti dekreta data ba eleisaun parlamentár 2023, tanba nu'udar tékniku sempre pronto, maibé tenki mós iha kordenasaun di'ak ho orgaun eleitural sira hotu no saida mak ohin ami ko'alia ho Prezidenti Repúblika sente nia anota ona hein anunsia de'it", nia afirma.

Psrte STAE mós sei garante kondisaun ba ema ho difisiénsia sira atu tuir votasaun, ida-ne'e mak hanesan proposta ida ne'ebé STAE hato'o ona ba Konsellu Ministru atu haree tok ba iha lei atu eleitor difisiénsia sira bele vota direta iha sentru votasaun de'it. (*)