Prezidente Komisaun Polítika Nasionál, Partidu Demokrátiku (CPN/PD), Adriano do Nacimento, hatete, dadaun halo hela prosesu ajustamentu no konsolidasaun ho estruturu partidu nian iha nivél nasionál to'o baze.

"Hanesan organizasaun preparadu, agora dadauk ami halo konsolidasaun estrutura iha nasionál iha baze e atu halo ajustamentu estrutura depois konsolidasaun", dehan nia iha Parlamentu Nasionál, sexta (16/12).

Tanba, iha fulan kotuk liubá Partidu Demikrátiku halo ona konfrensia nasionál ida iha Delta Nova, kona-ba halo ajustamentu ba estrutura.

Aleinde ne’e, Partidu Demokratiku dadaun seidauk bele halo kongressu nasionál no halo de'it mak konferensia nasional, tanba estatutu partidu mos fo dalan.

Tanba ida-ne'e, tranzisaun ho estatutu ida ne'ebé PD halo iha tinan-2017, artigu ida iha ne'eba mós ko’alia kona-ba kuandu eleisaun parlamentar 2023 hotu, partidu tenke hala'o kongressu nasionál, másimu iha tinan ida nia laran.

"Sim, tuir estatutu ne'e hatete depois eleisaun parlamentár ne'e hotu, nia másimu tinan ida nia laran halo ona kongressu", dehan nia.

Nune'e, estrututu foun ne'ebe eleitu, nia mandatu ba tinan-lima hodi prepara no halo atividade partidu nian to'o iha eleisaun tinan-lima tuir mai.

Tanba, estatutu PD nia mos hatete, enkuantu lideransa periodu ida-ne'e lidera partidu demokrátiku ba partisipa eleisaun ruma votus menus, maka lideransa ne'e sei hetan sansaun polítika, nia labele kandidata-an tán iha eleisaun ba Prezidente ka Sekretáriu Jerál ou estrutura nasional ruma ih partidu laran.

Tanba ne'e, mandatu iha tinan ida-ne'e hahú halo preparasaun ba eleisaun parlamentár no delega hela ekipa ida hodi halo planu ka matéria ho projetu polítiku ne'ebe atu aprezenta ba eleitor sira iha kampaña parlamentar.

"Aban bainrua kampaña karik, programa projetu polítiku saida mak PD atu oferese ba povu hodi vota, ne'ebé ami-nia ekipa elabora hela matéria ka projetu politiku, atu PD halo koligasaun ho partidu seluk karik bele iha ona dokumentu no programa ba tinan-lima atu aprezenta iha koligasaun", nia afirma.

Nune’e, dadaun prepara hela, tanba sé PD ukun hamutuk ho koligasaun ka karik manán mós iha ona planu ka programa antes hodi implementa de’it atu dezenvolve Timor-Leste iha tinan-lima oin mai, durante mandatu. (*)