Diretór Ezekutivu Ajénsia TIC TIMOR I.P, Roberto Caitano de Sousa Vicente hanesan mós Koordenadór Komisaun Teknikal Eventual (KTE), informa, atividade ne’e atu atualiza progresu servisu ne’ebé atinji ona iha tinan 2022.
“Reuniaun ne’ebé Ajensia TIC hala’o ne’e atu envolve fali membru KTE sira ne’ebé envolve iha prosesu programa Identifikadór Úniku, komisaun eventual ne’e kompostu hosi Ministériu relevante sira, komesa kedan iha 2020 ho nia papél importante ida hodi prepara planu estratéjiku ba implementasaun programa Identifikadór Úniku”, dehan nia iha Timor Plaza, tersa (13/12).
Nia informa, palanu estratéjiku ba implementasaun programa UID ne’e submete iha tinan 2021 no komisaun téknikal eventual ninia papél importante hotu ona bainhira submete ona dokumentu planu stratejiku ba iha konsellu ministru hodi hetan ona aprovasaun.
Maibé, iha prosesu transitóriu hodi hari Ajénsia ne’ebé sei toma konta ba implementasaun programa indentifikadór úniku iha dokumentu ne’e, husu fali atu kontinua mandatu komisaun téknikal eventual bainhira iha prosesu ba forma Ajénsia ba IUD nian no konsellu ministru hasai fali rezolusaun ida, husu atu kontinua.
Tanba ne’e, hato’o apresiasaun ba membru komisaun téknikal eventual no parseiru sira hotu ne’ebé durante servisu makas hodi apoiu ba prosesu hahú to’o ohin loron.
“Progresu servisu barak atinje ona, mesmu foin hahú, maibé hakarak hato’o agradese ba komisaun téknikal eventual (KTE), parseiru sira hotu ne’ebé servisu la hatene oras, nunka sura kolen ohin loron ita bele hahú ona prosesu aprovivionamentu ba programa ida ne’e, ita bele atinje programa identifikadór úniku ida ne’e, bainhira ita servisu hamutuk hanesan ekipa hodi fahe todan ba malu neneik iha prosesu ne’ebé ita aprende hamutuk”, nia esklarese.
Nune’e, fiar katak ho konfiansa tomak bele implementa projetu ho susesu hodi rezolve identidade falsu ka fraude no identidade dupla, hodi hafasil servisu administrasaun Governu nian ba iha future.
Alende ne’e, Diretór Diresaun Úniku ID, Florindo Guterres da Costa mós halo aprezetasaun kona-ba progresu servisu Diresaun Identifikadór Úniku, Koordenadór Komunikasaun, Miqueias da Conceição halo aprezentasaun kona-ba estratéjia komunikasaun no atualizasaun atividade komisaun ho Feedback hosi sosializasaun iha Munisipíu, Asesor Gabinete reforma Administrativa Prezidensial Konsellu Ministru (PCM), Fausto Gama halo aprezentasaun kona-ba, tanba sá programa indentifikadór úniku sai importante los hanesan baze ba implementasaun Governu eletroníku iha teritoriu tomak.
Liña ministerial ne’ebé involve iha membru komisaun teknikal eventual (KTE) mak hanesan, Ministériu Prezidensial Konsellu Ministru (PCM), Ministériu Saúde (MS), Ministériu Solidariedade Sosiál no Inkluzaun (MSII), Ministériu Edukasaun Juventude no Desportu (MEDJ), Ministériu Interior (MI), Ministériu Justisa (MJ), Komisaun Funsaun Públika (KFP), Ministériu Finansas (MF), Ministériu Estatál (MAE) inklui TIC TIMOR.
Reuniaun ne’e, partisipa mós hosi Diretór Dezenvolvimentu Sistema Aplikasaun-DSA, Justo Fernandes, Diretora Orsamentu Planeamentu Finanseira no Jestaun Tezouraria-DOPFJT, Maria da Frosa Marques inklui funsionáriu Diresaun Úniku ID. (*)