Serimonia ne'e, hahú ho lia dadolin, tara tais no lok bua malus tuir lisan Manufahi nian.

Hafoin Ministru administrasaun estatal, Miguel do Carvalho simu xave husi kompañia no entrega ba administradór munisípiu Manufahi no kontinua ho serimonia kua fita no loke odamatan husi Ministru Asuntu parlamentár no komunikasaun sosiál.

Prosesu inaugurasaun ba edifisiu Postu Administrador Alas ne'e hetan bensaun husi amu pároku husi Paroquia Alas.

Nune’e, Ministru Asuntu parlamentár no komunikasaun Sosiál, Francisco Martins da Costa Pereira Jerónimo agradese ba komunidade Alas, tanba bele simu membru Governu sira ho di’ak.

Nia afirma, prosesu harii edifisiu ne'e nu’udar politika governu nian, tanba ema mak sai sentru ba dezenvolvimentu Nasionál, nune'e governu kontinua kria kondisaun ne'ebé di'ak ba povu.

Husu ba komunidade atu idaidak asume responsabilidade hodi kuida sasán no uma ne'ebe kria husi governu, tanba ida-ne'e sai hanessn fatin hodi hala'o servisu.

Ikus liu, Ministru Jeronimo lori MAPKOMS no governu nia naran hato'o boas festas natál no prosperu anu novu ba komunidade sira iha postu administrativu Alas.

Entretantu serimonia inaugurasaun edifisiu postu administrativu Alas ne'e, hetan partisipa husi Ministru administrasaun estatal, diretor jeral ministeriu Estatal, administradór munisípiu Manufahi, Administradór postu administrativu Alas, Xefe suku sira no mós komunidade Alas. (*)