"Timor-Leste no Singapura iha relasaun ne’ebé metin iha tinan hirak ne’e, rai ki’ik liu Timor, maibé sira hakarak apoiu ita tama ASEAN", dehan Horta liuhusi komunikadu imprensa ne'ebé fo sai iha Gabinete Prezidente Repúblika (PR), sesta (09/12).
Pozisaun estadu singapura mós hakarak apoia liutan Timor-Leste iha área formasaun no hakarak haree investimentu boot liu iha Timor-Leste.
Prezidente Repúblika haree Timor-Leste hanesan nasaun ne'ebé foin ukun-aan liu tinan 20, nune’e ekonómia atu la’o diák presiza iha investimentu ne’ebé barak.
Tanba ne'e, Prezidente Repúblika mai singapura, atu ko'alia asuntu ne'e ho Xefe Estadu Singapura Halimah Yacoob liliu Primeiru Ministru Singapura, Lee Hsien Loong.
‘’Hasoru malu ho Prezidente Repúblika Halimah nu’udár fígura konsensuál no koñesida hanesan advogada ne’ebé sempre luta ba direitu traballadór nomós feto prmeiru no mulsumana ida sai Prezidente Repúblika, Nia (Halimah) hato’o polítika Singapura nian no kontinua hasoru malu ho Primeiru Ministru, Lee Hsien Loong nu’udár oan mane husi Lee Kuan Yew”, nia afirma.
Tanba, relasaun bilateral entre Timor-Leste no ASEAN nafatin metin no importante atu aposta nafatin iha formasaun rekursu humanu no mós investimentu.
Republika Singapura hanesan nasaun ne'ebé hala’o operasaun missaun ba pás ONU dahuluk iha Timor-Leste iha tinan 1999, maibé Timor-Leste la iha kooperasaun iha áarea seguransa ho Singapura, maske iha kooperasaun solida ho Amérika, Nova Zelándia, Austrália no Portugál.
Nune'e, Timor-Leste ho Singapura presiza kria kooperasaun iha área seguransa no defeza liu-liu iha matéria servisu sekreta (Intelijénsia) hodi kombate krime organizadu, fase osan (money laundry) no droga, tanba Singapura experiénsia makaas iha área ne'e nomós apoia Timor-Leste iha área formasaun diplomátika, hodi reforsa adezaun Timor-Leste ba ASEAN.
Kooperasaun iha seitór seluk mak kona-ba funsionamentu administrasaun públika, tanba Singapura okupa pozisaun dalima iha mundu, nasaun ne'ebé funsaun públika di'ak liu.
Xefe Estadu mós relata ba nia omólogu no Xefe Governu husi Singapura kona-ba progressu husi situasaun ekonómika, dezenvolvimentu Greater Sunrise no situasaun trankuilidade iha Timor-Leste, tanba la iha ameasa, violensia polítika, relijiaun, diskriminasaun étnika.
Tuir informasaun ne'ebé mai husi CEO Woodsite nian, problema uluk hanesan obstákulu ba pipeline mai Timor, agora la ko’alia, ne’e la’os ona problema, maibé problema de’it mak finansiamentu, ida ne’e Timor bele mobiliza atu investe iha Greater Sunrise.
Xefe Estadu mos esplika jerálmente nu’udár porta-vóz Estadu nian no repúblika singapura iha interesadu los ho ida ne’e no emprezáriu sira husi singapura mos hakarak partisipa.
PR Horta promete atu kontinua dezafia governu no Trade Invest Timor-Leste atu promove Timor-Leste, tanba iha koolaborasaun di'ak entre Líder sira no iha estabilidade polítika. (*)
