“Ohin Prezidente Repúblika simu kredensiál husi embaixadór foun Japaun nian iha Timor-Leste, Kimura Tetsuya, hodi substitui fali embaixadór, iha aprezentasaun karta kredénsia husi Kimura nian”, dehan Vise-Ministru Negósiu Estranjeiru no Kooperasaun (V-MNEK), Julião da Silva, hafoin remata serimónia aprezentasaun karta kredénsia iha palasiu PR, segunda (5/12).
Nia haktuir, durante hala'o aprezentasaun karta kredensiál, Xefe Estadu mos ko’alia kooperasaun Bilateral entre Timor-Leste ho Japaun, ne’ebé mensiona ituan mós kona-ba kontinuasaun apoiu husi Governu Japaun ba dezenvolvimentu ekonómia, dezenvolvimentu Greater Sunrise, inklui aprezenta mos kestaun lubuk ida, ne’ebé la’o durante tinan 20 nia laran.
“Kona-ba kooperasaun ne’ebé mak la’o, hanesan durante ne’e, ema hotu-hotu haree, agora husu atu kontinuasaun ba tinan oin, hodi bele hahú konstrusaun iha Aeroportu”, nia relata.
Nune’e, programa ne'ebe Timor-Leste ho Japaun sei implementa tuir mai mak kontinua nafatin ho Bolsu estudu ne’ebé durante hetan apoiu husi Governu Japaun liu husi sira nia ajénsia JAICA no husi serbisu agrikultura ho peska nian.
“Hanesan ema hotu-hotu hatene, kona-ba iha Ajénsia privadu ka Setór Privadu husi Japaun atu apoiu ba dezenvolvimentu Greater Sunrise, ida ne’e mak ita nia Prezidente Repúblika mós husu atu kontinua nafatin kooperasaun ne’ebé eziste iha Timor”, nia esklarese.
Maibé, kona-bá prezensa embaixadór Kimura nian, la’ós buat foun ba iha Timor-Leste, tanba nia mai ba daruak ona, uluk mai hanesan funsionáriu diplomata embaixada Japaun ninian iha tinan 20 ba kotuk, bainhira Timor-Leste hahú restaura ninia Independénsia, husi ne’e nia fila no agora nia fila mai hodi sai hanesan Xefe Misaun ba republika japaun nian iha Timor-Leste. (*)