Vise-Ministru Komérsiu no Indústria (VMKI), Domingos Lopes Antunes, hateten, fórum empresarial ne’e atu halo pra-akampamentu enkoraja foin-sa’e produtivu no kreativu.
"Sira ne’ebé mai ho idea negosiu inovativu hodi kria servisu ba sira nia aan-rasik liu husi fortalesimentu emprendedorizmu no ekosistema inovasaun inklui involvimentu foin-sa’e sira iha prosesu rekuperasaun ekonomia. Forum ne’e hola parte ba kompetisaun negosiu inovativu III MTC 2022 rejiaun sentral ne’ebé lansa ona iha loron 3 fulan-setembru 2022", dehan nia iha salaun Parokia Maubisse ne'ebé www.tempotimor.com asesu iha pájina ofisiál MTCI, sesta (25/11).
Eventu ne'e hetan partisipasaun husi Administrador Munisípiu Ainaro, Carlos Ximenes no Direktur Executivu SERVE, Florêncio da C. Sanches, orador na’in rua, Domingos E. Lurdes no Hermina da Silva, nu'udar empreendedora foinsa'e, nomos reprezenta husi BNCTL, Alcino Monteiro (Chefi Divisaun Kreditu BNCTL), Wilson Mendonça (Na'in ba SARA Horticultura) hodi partilla hanoin ka experiensia kona-ba emprendedorismu, papel insituisaun finanseira no apoiu governu ba dezenvolviemntu setor privadu.
Alende ne’e, empreza foinsa'e sira selesionadu hamutuk na’in-60 sei partisipa iha sesaun pra-akampamentu durante loron 3 hodi halo preparasaun di’ak liu tan ba sira nia ideia negósiu ne’ebé konstrutivu no sei akompaña husi ekipa fasilitadór sira no sei tuir kompetisaun iha loron ikus hodi hakat ba faze tuir mai. (*)