Print this page

PN Autoriza PR Horta Hala'o Vizita ba Repúblika Singapura

By November 21, 2022 586
Plenaria Parlamentu Nasional. Plenaria Parlamentu Nasional. Foto Suplay

Tempotimor (Dili)-Parlamentu Nasionál (PN) deside fo autorizasaun ba Prezidente Repúblika (PR), José Ramos Horta atu hala'o vizita estadu ba Repúblika Singapura durante semana ida, hahú husi (6 to'o 11 fulan dezembru tinan 2022).

"Rezultadu votasaun afavor 46, kontra 0, abstensaun 0, nune'e rezolusaun PN nian, kona-ba deslokasaun Prezidente Repúblika nian, ba Repúblika Singapura nian, aprovadu", dehan Vise Prezidente Parlamentu Nasionál (PN), Maria Angelina Sarmento hafoin anunsia rezultadu votasaun iha plenária PN, segunda (21/11).

Haree ba atividade vizita ne'e, Parlamentu Nasional mós simu konvite husi Prezidente Repúblika atu nomeia deputadu na'in-3 husi bankada governu no rua husi bankada opozisaun, hodi envolve iha delegasaun Prezidente Repúblika nian, maibé ne'e depende ba desizaun kada bankada idaidak nian.

Tanba, iha rezolusaun PN nian mós la obriga deputadu sira tenke tuir prezidente repúblika, nune'e meza sei entrega kompetensia tomak ba bankada idaidak atu foti desizaun.

Deputadu Bankada CNRT, Aderito Hugo, hatete, vizita xefe estadu ba iha Repúblika Singapura ne'e importante tebes, tanba durante ne'e singapura mak sai hanesan sentru ida ne'ebe Timor-Leste halo lobby hodi adere ba ASEAN.

Maske, dadaun ASEAN simu Timor-Leste sai hanesan observador, maibé liuhusi oportunidsde vizita sira hanesan ne'e, deputadu sira bele mós akompaña oinsa buka reforsa dalan legál sira hodi TL bele sai membru permanente ba ASEAN.

Deputadu Bankada FRETILIN, Antonino Bianco, hatete sira-nia parte fo fiar ba Xefe Estadu José Ramos Horta atu vizita ba Repúblika Singapura, tanba nia ba reprezenta estadu no povu.

"Ha'u hanoin ita la'os buka se nia mak loos, se nia mak sala, maibé tenke separa servisu, Xefe estadu ne'e nia reprezenta ona Parlamentu, governu, tribunal, tanba ne'e xefe estadu so uma pesoa, unipesoál, ita sira ne'e ekolozial, se votu iha ne'e halo liu, signifika katak, ita fo fiar ba xefe estadu atu ba, akompañadu husi Ministériu Negósiu Estranjeiru no Kooperasaun (MNEK), ne'e normal", nia afirma. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items