“Ha’u nia mensajen ba ha’u-nia membru Governu sira maka sira kontinua nafatin halo esforsu ezekuta hanesan baibain sira ezekuta, ezekusaun di’ak para bele presta serbisu di’ak ba ita nia sidadaun sira", nia dehan iha Paramentu Nasional, kinta-kalan (17/11).

PM Taur mós kontente ba membru governu sira-nia serbisu aprendizagem perfeisaun ne’e, aprende mellora tinan ba tinan, hodi serbí di’ak liu povu no nasaun.

Nia fó ezemplu, hanesan Prezidente Parlamentu Nasional, dehan, dezafiu iha rai laran dalaruma aumenta, tanba iha rejiaun no mundu aumenta, entaun tenke adapta-an atu hala’o dezenvolveimentu.

"Ha’u fiar iha forsa vontade ita-nia nasaun no povu nian", nia esklarese.

Purtantu ho orsamentu tinan 2023 ne'ebe sei foti iha mandatu governu nian ba dala ikus, ne'ebe Parlamentu Nasionál aprova ona, ida-ne'e bele fó kbiit ba Governu tinan oin ezekuta antes de nia mandatu hotu.

"Entaun ha’u hakarak lori ha’u-nia naran rasik, VIII Governu Konstitusionál nia naran, agradese ba Sr. Prezidente Parlamentu Nasionál, Sr. Vise Prezidente, Sekretária da Meza, Distintus/as Deputadus/as ba sira-nia pasiénsia, sira-nia kontribuisaun paraké orsamentu ne’e realmente aprova", Taur agradese.

Enkuantu OJE 2023 ho montante dolar amerikanu billaun US$3,16, ne’ebé ompostu husi Orsamentu Administrasaun Sentrál billaun US$2,8 (inklui ona Fundu Kombatentes Libertasaun Nasionál, billaun US$1), Orsamentu ba Seguransa Sosiál millaun US$235,7 no ba RAEOA millaun US$120.

Proposta OJE 2023 mak orsamentu dahuluk, ne’ebé Oitavu Governu Konstitusionál prepara bazeia ba regra orsamentál foun aprovadu husi Lei Enkuadramentu Orsamentál.

Tanba, proposta orsamentu ne’e kontempla ona ho orsamentu tuir Programa no alokasaun orsamentu ba prioridade nasionál ne’ebé define ona iha Lei das Grandes Opções ba Planu 2023 ne’ebé promulga husi Prezidente Repúblika, José Ramos Horta iha fulan juñu liubá. (*)