Nune’e, Ekipa televizaun Australian Broadcasting Cooperation akompaña husi Prezidente Konsellu Administrasaun Rádiu no Televizaun Timor-Leste, Empreza Públika (RTTL,ep), José António Belo ‘Taraleu’ hala'o audensia ho Prezidente Repúblika, José Ramos-Horta, hodi ko’alia kona-ba akórdu kooperasaun ne’ebé estabelese entre televizaun ABC ho mídia sira iha Timor-Leste.

“Ohin kolega sira mai informa ba Prezidente Repúblika saida mak sira sei halo atu apoiu mídia sira iha Timor-Leste liu-liu ba RTTL relasiona ho memorandu entendimentu ne’ebé asina ona entre RTTL ho ABC kona-ba troka kontíudu no hanorin English liu husi televizaun”, dehan Prezidente RTTL, hafoin audensia ho xefe estadu iha palasiu Prezidensial, Bairu-Pite, kinta (17/11).

Televizaun ABC manifesta, dahuluk materializa kooperasaun ho RTTL.ep liliu sei asina akórdu kooperasaun iha área formasaun no kapasitasaun lian Ingles ba mídia sira iha Timor-Leste, inklui harii seksaun lian Ingles iha RTTL.

Sorin seluk, Lead International Development Public Affairs, Jo Elsom, hateten, enkontru ho Xefe Estadu ne’e ko’alia liu kona-ba importánsia mídia no liberdade ba mídia nian, tanba mídia broadcasters nasional nia papel mak promove interese públiku nian nomos apoiu sidadaun sira atu asesu ba informasaun.

“Ami agradese tebes ho Prezidente, eh ami ko’alia liga ba dezenvolvimentu mídia nian no oinsá atu servisu hamutuk mídia iha Timor hodi harii kapasidade no “skill” ho matenek ne’ebé ami iha, nomos ami sei aprende buat balun husi mídia iha Timor, nune’e bele kria relasaun iha lian jornalizmu”, nia esklarese.

Jo Elsom mós agradese ba Prezidente Repúblika, José Ramos-Horta, tanba bele disponibiliza nia tempu hodi hasoru-malu ho sira. (*)