Abertura ba Semináriu ne'e, reprezentante Sekretáriu Estadu Kooperativa SEKOOP, Xefe Gabinete, Arlindo Marcal, hatete, situasaun realidade iha Timor-Leste maioria la fó importánsia ba feto atu foti desizaun ruma.

"Abordagem Integradu Igualidade Generu Setór Kooperativa ne'e issu ida importante tebes, tanba relevante tebes ba ita nia Instituisaun, agora ita bele haree realidade iha sosiedade kona-ba ba feto sira ne'ebé iha setór kooperativa", dehan nia iha salaun Kooperativa HIKMOR, Suku Liurai, Munisípiu Aileu, kuarta (16/11).

Tanba, situasaun ne'ebé Timor-Leste enfrenta dadaun, feto maioria iha de'it uma ka halo servisu uma nian, oinsá atu tane kaben (laen) ho di'ak no dalabarak feto hala'o serbisu ne'ebé boot, maibé la iha vensimentu.

"Simu vensimentu karik montante la hanesan ho mane sira nian, nune'e mós ho ita nia kultura hola feto no mane, kuaze la iha autoridade", dehan nia.

Nune'e, feto maioria la partisipa iha eventu barak, tanba la iha tempu eh sira haree liuba oan no serbisu uma laran.

"Feto barak liu la partisipa iha vida politika, la partisipa iha Governu no barak liu mak la tama área Seguransa hanesan F-FDTL ho PNTL, tanba kultura halo impedimentu ida ba ba ita nia feton sira", nia afirma

Alende ne'e, Diretora Gabinete Igualidade Jeneru, Ana Paula Pacheco Magno, afirma, ema hotu iha direitu, tanba igualidade jeneru iha nia ramu ne'ebé ajuda feto sira hodi kontribui ba sosial viabiliza dezenvolvimentu iha Timor-Leste.

"Igualidade jeneru hanesan fundamental ba ekonómia ne'ebé iha ramu oioin, nune'e mós halo serbisu di'ak ba sosiál viabiliza dezenvolvimentu ba sosiu-ekonómiku no kulturál", nia subliña.

Tanba, liuhusi atividade semináriu bazeia ba topiku ne'ebé sita ona iha leten, bele hamoris fali instrumentu sosiu-ekonómiku atu bele hakmaan ba efeitu sira iha krize no bele kontribui hamenus ba desigualidade.

Semináriu ne'e, hala'o dalarua ona, ne’ebé dahuluk iha Munisípiu Likisa no daruak iha Munisípiu Aileu iha Kooperativa HIKMOR, importansia liu ba kooperativa ne'ebé involve husi feto.

Nune’e, membru CU HIKMOR, Domingas Dias Fernandes, hatete, nia parte konsege aprende ona líderansa iha uma laran no sei esforsu hodi foti desizaun tuir feto nia direitu.

"Husi sesaun primeiru, ami aprende kona-ba feto sai lideransa, tanba ‘kadang’ feto sira sai vítima iha uma laran, serbisu mak tein de'it, maibé tuir ami rona, feto sira mós iha mundansa no bele sai lideransa iha Munisípiu sira", nia esplika.

Nia akresenta, feto ho mane tenke iha direitu hanesan, tanba ne’e nia parte sei halo esforsu hodi hatudu ba mane katak, desizaun hotu ne'ebé mane foti, feto sira mós bele foti.

"Mane sira mak halo buat hotu, maibé ami feto mós bele ba oin, maibé tenke esforsu atu ami mós bele", nia salient.

Partisipa iha semináriu Abordagem Integradu Igualidade Generu Setór Kooperativa ne'ebé realiza iha Kooperativa CU-HIKMOR maioria husi membru kooperativa feto. (*)