"Hakarak haree kampaña 2023 mai ne'e, 100 pursentu sivilizadu, laiha atake, insultu, entre partidu sira. Partidu sira aprejenta ida-idak nia programa bá povu, ha’u haree partidu la aprejenta nia programa, ha'u nu’udar Xefe Estadu ha’u entervein, imi nia programa iha ne’ebé, ha’u hakarak haree, la’ós bá de’it promesa, vota bá ami, ami hatama o ba asesór, vota bá ami hetan kadeira rua depois lobi ho CNRT, FRETILIN atu halo ai-tonka, ha’u sei akompaña 100%,” dehan Horta hafoin hala'o vizita kortezia ba Sentru Bambu iha Tibar, Kuarta (16/11/).

Nune’e, dadaun Xefe estadu preokupadu hela ho preparasaun, hakarak haree eleisaun parlamentar 2023, tenke la'o iha ambiente di'ak, pasífiku, labele hanesan ho eleisaun, kampaña prezidensial, ne'ebe kria insultu no tolok inklui kandidatu balun ho elementu halo ameasa.

Xefe estadu iha relasaun metin no ko’alia ho líder sira hotu no hahú ho Prezidente partidu CNRT, Kay Rala Xanana Gusmão, Marí Alkatiri, Primeiru Ministru, Taur Matan Ruak, Prezidente Repúblika períodu 2017-2022, Francisco Guterres ‘Lú Olo’, inklui  Eis-Tenente Jenerál Lere Anan Timur.

Aleinde Lider supremu partidu KHUNTO, José dos Santos Naimori mak to’o agora seidauk hasoru malu ho Xefe estadu, maibé hasoru de'it mak Vise-Primeira Ministra Armada Berta, hodi halo enkontru di’ak loos.

"Purtantu, laiha problema, ema hotu bele haree ambiente desde fulan-Maiu mai oin ne’e ambiente di’ak ho Parlamentu Nasionál, Governu, Prezidénsia. Ha’u nia responsabilidade mak ida ne’e buka viabiliza Governu nia servisu, Prezidente Repúblika labele sai opozisaun ba Governu ka halo konfrontasaun ho Parlamentu Nasionál”, nia esplika

Tanba ne'e, Xefe estadu sei haree no akompaña másimu ba partidu ne’ebé ko’alia mangame, kuandu la aprejenta programa sei bolu Komisaun Nasional ba Eleisaun sira (CNE-sigla portuges) hodi  aviza kedas ba partidu sira, hakarak haree programa aprezenta bá povu. (*)