“Ha’u kontente Governu rona sosiédade sivil, rona ema hotu-hotu, rona ha’u rasik, atu fó de’it ba família ne’ebé iha duni difikuldade no vulnerável inklui mós sira ne’ebé nia rendimentu familiár menus husi US$500, tanba ne’e Dekretu lei subsídiu anuál ba uma-kain promulga tiha ona iha loron rua liu bá”, dehan Horta iha edifísiu Institutu Bambu Tibar, Kuarta (16/11).

Xefe estadu mos hatete, husi inisiu governu deklara sei atribui subsídiu universál ba uma-kain hotu iha territóriu nasionál, maibé hafoin rona opiniaun husi Xefe Estadu no sosiedade sivíl, ikus mai governu halo alterasaun ba dekretu lei refere hodi atribui de’it ba família vulnerável no família sira ne’ebé nia rendimentu menus husi US$500 kada-fulan.

Tanba ne'e, Xefe estadu mos konkorda hodi promulga dekretu lei refere, iha ne'ebe ninia finalidade atu fó prioridade ba família vulnerável sira, tanba folin produtu, importasaun sa’e hotu, inklui sira ne’ebé manán menus US$500 bele simu apoiu ruma. (*)