Login to your account

Username *
Password *
Remember Me

PN Lamenta Manifestante Hasai Liafuan Na’ok-ten ba Deputadu sira

Manifestante ne’ebé membru PNTL kaptura, segunda (14/11). Manifestante ne’ebé membru PNTL kaptura, segunda (14/11). Foto suplay

Tempotimor (Dili)-Parlamentu Nasionál PN (PN) lamenta ho asaun manifestasaun husi Aliansa Maubere Nasional (AMN) ne'ebe hasai liafuan na'ok-tén ba deputadu sira.

Nune’e, Polísia Nasionál Timor-Leste (PNTL) deside kaptura ona Membru Aliansa Maubere Nasionál (AMN) hamutuk 29, inklui defisiensia matan na'in-10.

Deputada Bankada FRETILIN, Maria Angelica Rangel, hatete, hanesan membru 12 de novembru ida, sente triste bainhira haree joven sira hasai liafuan la merese ba deputadu sira.

"Ligasaun ba kestaun ne'ebe ita oan sira sei halo demostrasaun, ha'u ko'alia ho naran pesoal hanesan membru 12 de novembru ida, triste tebes kuandu horseik ami asiste ami-nia loron ne'ebe determinante tebtebes iha altura ne'eba, ami-nia maluk barak mak mate, mane no feto, tempu joven uluk lahanesan ida-ne'e, maibé iha ne'eba ha'u asiste direta katak, joven sira agora tolok orgaun sobernia na'ok-ten, ne'e la eduka tebes," nia afirma iha plenaria PN, segunda (14/11).

Tuir nia, sidadaun hothotu hato'o diretu ba petisaun ne'e normal, tanba konstituisaun artigu 48 mos fo dalan, maibé fatin istoriku ne'ebe joven barak fo sira-nia vida ba rai ida-ne'e la marese ba joven sira agora atu hasai linguajen na'ok-ten ho kanten ba orgaun soberania sira.

"La merese atu bolu ema na'ok-ten, la merese atu bolu ema koruptor se faktu laiha, tanba ita-nia rai ne'e iha orgaun soberanu haat, ne'ebe mak interdependente ba malu, katak governu parlamentu ka se-se de'it mak sala, tribunal mak sei determina, sira ne'e na'ok-ten ou koruptor ka lae, mais la'os julga popular hanesan ida-ne'e," nia esklarese.

Nune’e, Deputadu Bankada Uniaun Demokrátiku Timorense (UDT), Francisco David, husu ba joven sira ne'ebe foin tun husi foho, presiza adopta espiritiu sira tuir sidade ninian, bainhira halo manifestasaun.

"Karik alin oan sira tun husi foho mai iha Dili, tenke ser ho espiritu adoptasaun ho Dili oan sira, la'os mai para halo fali disturbu iha nasaun laran ne'e," nia hatete.

Tanba, pro ba Timor, deputadu sira mos terus no la'os labarik sira ne'ebe foin moris iha tinan 2000 mai leten mak atu domina fali iha Dili laran.

"Ha'u pesoalmente hakarak buka duni ida naran Xisto, ha'u rona agora nia iha Yayasan Hak.  Agora dadauk ne'e manifestante ne'e orgniza husi ema-nia aman ida naran Xisto, ha'u senti ofendidu nu’udar sobrevivente masakre santa krus, e sai mobilizador masa iha tempu ne'eba, nia hasai liafuan A to'o Z, na'ok ten, kanten, talves nia aman milisia iha hela Atambua ne'ebá karik, hakarak halo disturbu iha nasaun ne'e nia laran," nia hatete.

Deputadu Bankada Partidu Demokrátiku (PD), Adriano do Nacimento, hatete, kona-ba estudante sira ne'ebe halo demostrasaun, parte PD aseita ho intervensaun prezidente PN nian ne'ebe atu ko'alia ho reitor hodi haree asaun ida-ne'e.

Maibé, bankada PD propoin atu Parlamentu mos bele delega Sekretariu Jerál ka ekipa funsionáriu Parlamentu nian, hodi hakbesik-an ba manifestante sira atu informa ba sira katak, sira-nia ejizensia atu kansela sosa kareta ne'e Parlamentu Nasional hasai tiha ona desizaun.

"Presiza komunika ba sira katak, parlamentu simu tiha ona sira nia ejizensia, tanba ne'e mak ko'alia didiak ho sira, se hanesan prezidente hatete, ema liur mos tama ona, entaun ha'u hanoin halo mos komunikasaun ho sira lai, e ita hato'o ona ba sira mak sira kontinua ejize fali buat seluk ou buat jeral ne'e buat kestaun seluk ida, mais importante ba ita mak delega ema ruma ba hato'o ba sira katak, desizaun iha tiha ona," nia propoin.

Maibé, Deputadu Bankada Partidu Libertasaun Popular (PLP), Francisco de Vasconselho, hatete, kona-ba sujestaun husi deputadu balun nian atu haruka delegasaun ruma ba ko'alia ho manifestante sira ne'e la presiza.

Tanba, inisiativa atu kansela sosa kareta ne'e la'os tanba kumpre manifestante sira nia ejizensia maibé, parlamentu rasik mos iha insiativa ba ida-ne'e desde tinan 2018.

"Iha 2018 ita tama mai, parlamentu iha inisiativa rasik, iha kinta lejistura ita hola de'it kareta 35, e ami mak halo proposta atu ko'a osan iha momentu ne'eba, e iha 2020 ita tau fali osan ne'e mos ko'a, iha 2021 kareta ba meza parlamentu ne'e mos ita ko'a, ne'ebe la'os sira mak halo ejizensia, parlamentu nasional hatene halo politika atu jere ita-nia riku soin, governu mos hatene ida-ne'e," nia afirma.

Nia dúvida ho Manifestante sira-nia ejizensia, tanba founfoun ne'e ejize kansela kareta, maibé agora ko'alia fali ona kona-ba lei pensaun vitalisia.

"Ohin ha'u haree sira ko'alia fali kona-ba lei pensaun vitalisia, ne'e kala haksoit ida ba fali ida, pior liután besik loos ita, kualker deputadu ida sai, sira hakilar dehan na’ok-ten, Universidade ida sira agora kria fali bandidu iha laran ne'eba, polísia haruka para, tanba distansia ne'e besik liu PN, haruka ba demo iha Tasi tolu ne'ebá," nia dehan.

Prezidente PN, Aniceto Longuinhos Guteres Lopes, hatete, ejizensia ne'ebe hato'o husi deputadu sira, meza rejista hotu ona no sei buka maneira atu ko'alia ho Komandnte Jeral PNTL, Komisiáriu Fuastino da Costa no Reitor UNTL atu haree situasaun ne'e.

Tanba, automatikamenta joven sira halo manifestasaun ne'e la'os atu insulta, mesmu la'os orgaun sobernia mos sira halo manfestasaun atu espresa sira-nia hanoin, se kritika karik, kritika de'it, maibé la'os insulta ema.

"Satán, sira halo loos iha dalan besik PN, para deputadu sira tama sai depois insulta na'ok-ten, kan ten, ne'e labele hanesan ne'e, se kontinua hanesan ne'e ita bele husu ba PNTL atu bele hases husi ne'ebá, satán ema liur tama ona kampus depois halo manifestasaun hasoru orgaun soberania ke agora halo hela nia kna’ar ida atu hola desizaun ba vida estadu ida-ne'e nian", nia esklarese. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

Popular

Error: No articles to display

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« March 2024 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Tempo Timor Networks

Online Counter