Print this page

TIC TIMOR Sei Sosializa Identidade Únika iha Ainaru no Aileu

By November 10, 2022 526
Ekipa Diresaun Identidade Úniku foto hamutuk ho Autoridade sira iha Munisípiu Ermera. Ekipa Diresaun Identidade Úniku foto hamutuk ho Autoridade sira iha Munisípiu Ermera. Foto Suplay

Tempotimor (Dili)-Tuir planu Ajénsia Teknolojia Informasaun no Komunikasaun (TIC Timor I.P) liuhusi Diresaun Identidade Úniku sei hahú halo sosializasaun ba programa ID Úniku iha Postu Administrativu 8 husi Munisípiu Ainaru no Aileu, ne’ebé hahú husi loron 14 to’o 23 fulan-novembru tinan 2022.

Nune’e, sosializasaun programa ID Únika ba Administradór Postu, Xefe Suku, Xefe Aldeia no Funsionáriu destakadu sira sei hala’o iha Salaun Postu Administrativu sira iha Munisípiu Ainaro no Aileu.

Tuir orariu ba Munisípiu, loron 14 fulan-novembru ekipa sosializasaun sei halo aprezentasaun iha Postu Administrativu Ainaro Vila, 15 fulan-ovembru iha Hatu-Udo, 16 fulan-novembru iha Hatu-Builico, 17 fulan-novembru iha Maubise no kontinua ba Munisípiu Aileu, Postu Administrativu Aileu Vila iha loron 18 fulan-novembru, Likidoe iha loron 21 fulan-novembru, Remexiu iha loron 22 fulan-novembru no remata iha Postu Administrativu Laulara iha loron 23 fulan-ovembru tinan 2022.

Ajénsia TIC TIMOR I.P nu’udar Institutu Públiku ho ninia natureza jurídika ne’ebé iha autonomia administrativu, orsamentu no patrimóniu rasik tuir Dekretu Lei númeru. 29/2017. Tutela ba Primeiru-Ministru, ne’ebé lidera husi Diretór Ezekutivu.

TIC TIMOR iha misaun hodi implementa polítika no estratéjia ne’ebé aprova ona iha matéria Teknolojia, Informasaun no Komunikasaun, hodi jere rede informátika Governu nian no entidade públiku sira seluk, inklui halo jestaun ba infraestrutura teknolojia, informasaun no komunikasaun no fó apoiu iha área Teknolojia, Informasaun no Komunikasaun no Sistema Informasaun nian.

TIC TIMOR liuhusi Diresaun ID Úniku hahú implementa Programa Identidade Úniku (IDU) ne’ebé sei hala’o rejistrasaun ba sidadaun Timor-Leste, nomos rezidente sira hotu ne’ebé hela iha Timor-Leste.

Nune’e, iha prosesu implementasaun ne’e, Diresaun ID Úniku sei hala’o sosializasaun ba Programa Identidade Úniku (IDU) iha territóriu Timor laran.

Tanba, Sistema ID Úniku permite Governu atu hadi’ak atendimentu servisu públiku, hadi’ak jestaun no koordenasaun politika sosiál sira.

Tanba ne’e, permite Governu no setór privadu atu identifika di’ak liu ninia sidadaun sira no ema sira iha ninia rai-fronteira laran hodi responde ba pergunta sira hanesan “Ita mak sé?”, “Ita mak ema ne’e duni ka la’e?”,

ID Úniku hanesan identidade dijitál ida ne’ebé sei uza hodi identifika no auténtika ema, nune’e sei konsiste husi: Númeru ID Úniku (NIU) hó díjitu 10 (kria aleatoriamente), Informasaun biográfiku (naran, data moris, no fatin moris) no Informasaun biométriku (finger-print/liman fuan, imajen Oin/Facial image no iris/matan).

Sosializasaun ne’e sei hetan partisipasaun husi Diretór Ezekutivu  TIC Timor I.P, Ekipa ID Úniku, Autoridade Munisipál sira, autoridade Postu Administrativu, xefe suku, Xefe Aldeia, no ajente estadu inklui mós funsionáriu destakadu husi Ministeriu iha Postu Administrativu sira iha Ainaro no Aileu.

Antes ne’e, Diresaun IDÚ mós halo ona sosializasaun ba parseiru dezenvolvimentu sira, Ministériu sira, Universitáriu no entidade relevante sira seluk, no hala’o ona iha Postu Administrativu sira iha Munisípiu Likisá, Munisipál Ermera no Rejiaun Autonomia Espesiál Oekussi Ambeno (RAEOA) no sei kontinua ba Munisípiu sira seluk. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items