"Agora auditoria interna parlamentu nian halo tiha ona, katak iha indisiu korupsaun, ha'u haruka sekretariu jeral enkamiña ona ba Komisaun Anti Korupsaun", dehan Prezidente Parlamentu Nasional (PN), Aniceto Longunhos Guterres Lopes iha plenaria PN, kuarta (9/11).

Tanba, prosesu akizasaun ba kareta pajero sport hamutuk 30-resin ne'ebé Parlamentu Nasionál (PN) hala'o iha tinan 2019, deskonfia iha indisiu ba korupsaun.

Tanba, momentu ne'eba, parlamentu nasional prevee osan ba prosesu akizasaun ba viatura, atu sosa pradu, maibé ikus sosa fali pajero sport.

"Foufoun tau ona atu sosa prado, mais sai fali pajero, parese ke la tuir espesifikasaun mós kuandu sosa ne'e, sai problema", nia hatete.

Problema ne'e, dalaruma mosu tanba politika sosa kareta ne'e mós sai hanesan masin midar ne'ebe kuandu kareta iha ona ne'e sempre mosu problema hela de'it.

Tanba ne'e, presiza hanoin fali oinsa atu reve politika sosa kareta, hodi evita PN hasoru problema.

Nia fo ezemplu, problema kona-ba kombustivel, tanba Xefe bankada KHUNTO dala ida koko ona, lori kupon 30 litru hamutuk ho jergen 30 litru nian ba enxe mina iha pertamina, maibé afinal to'o metade de'it, ida-ne'e hatudu kompaña mina sira halo explorasaun ba estadu inklui benkel sira.

"Entaun atu evita sira ne'e hotu ita tenke muda politika forma ida oinsa atu fasilita transporte ba deputadu sira", nia esklarese. (*)