"Ha'u halo defeza de onra, tanba ha'u nia maluk deputada CNRT ohin ko'alia temi FRETILIN, ba povu hothotu ne'ebé akompaña, ita agradese, tanba ita bele ko'alia ba malu, atu fo hanoin ba malu, mais la'os atu sukit buat ne'ebe ke la merese," dehan nia iha PN, tersa (11/08).
Tanba, deklarasaun ne'ebé Bankada CNRT hato'o iha debate jeneralidade ba OJE, sita mos pozisaun bankada FRETILIN nian ne'ebe vota kontra ratifikasaun akordu fronteira maritima entre Timor-Leste ho Australia iha PN.
Maibé, bankada FRETILIN hakarak hatete, iha diskusaun ho aprovasaun fronteira iha ne'e deputadu sira mos tur to'o kalan hotu, tanba defende prinsipiu FRETILIN.
Bankada Fretilin mos iha prinsípiu mak defende eroi martires sira luta nein fo rai pedasuk ida ba ema seluk, satán riku, ne'e mak FRETILIN defende, maibé kona-ba Fronteira maritima fahe ba buat rua, ida mak fronteira, ida seluk riku-soin.
Maibé, buat ne'ebe liu, liu ona no FRETILIN haree, buat pro no kontra iha estadu ne'ebe de'it mos sempre akontese.
"Dentru de prinsipiu estadu ne'e hanesan ne'e, pro kontra bele akontese, maibé depois de desizaun sai eh ida ne'e mak regra, tanba ne'e Fretilin ohin mai hatete, fretilin valoriza erois no martires, tanba fretilin nia ema duni mak eroi no martires", nia afirma
Ko'alia kona-ba uma kbi'it la'ek (UKL), ne'e governu anterior nian ka la'os, maibé tuir buat ne'ebe uluk governu anterior halo mak uma MDG, la'os uma kbi'it la'ek.
"Uma kbi'it la'ek nia modelu oin seluk, uma MDG oin seluk, maibé buat ne'ebe liu ne'e, liu ona, ita tenke buka buat ne'ebé di'ak ba oin", nia dehan.
Tanba ne'e, di'ak liu hothotu hamutuk hateke ba oin, hodi kuruji buat ne'ebe laloos no labele fila ba kotuk.
"Konsiderasaun buat ne'ebe importante di'ak ne'e, ita tenke uza, maibé buat at husik ona", nia esplika
Deputada Bankada CNRT, Bendita Magno hatete, nia parte sei lembra, bainhira ratifika fronteira maritima iha uma fukun PN, Prezidente Parlamentu sesante Arão Noe Amaral konvida deputadu sira hamrik atu kanta hino nasional, maibé deputadu husi FRETILIN lakohi hamrik hotu so deputadu José Augustinho Siqueira Somotxo mesak mak hamrik.
"Ha'u sei lembra, karik iha ha'u sei kuda hela momeria ne'e, wainhira TL ratifika ninia fronteira marítima, iha uma fukun PN ida-ne'e, prezidente PN sesante husu ita hotu hamrik hodi hananu hino nasionál atu fo onra ba eroi sira, maibé partidu Fretilin la hamriik hodi fo onra, ezeptu so deputadu "Somotxo" mesak, sira vota kontra tiha fronteira maritima, depois lakohi tán hamrik hodi hananu hino nasional, hanesan ha'u temi ona, maibé hakfodak teki-teki mai husu fali ita atu hananu", dehan nia. (*)
