“Ami KEP-MRS Munisípiu Vikeké, Postu Uatulari hakarak husu ba Deputadu kinta Lejislatura iha Parlamentu Nasionál atu kansela sosa karreta 31 ho Leptop 65 tanba gastu osan povu nian ho montante boot tebes. Ikus liu ami KEP-MRS Munisípiu Vikeke, Postu Uatulari sei tun  ba sidade hodi hamutuk ho KEP-MRS Nasional atu halo Manifestasaun ne'ebé sei realiza iha tempu badak nia laran ne'ebé organiza husi Aliansa Maubere Nasional”, dehan Portavoz  Nelson da Cruz liuhusi konferensia imprensa iha Postu Administrativu Uatulari, Munisípiu Vikeke, sábadu (05/11).

Tanba Timor-Leste hanesan estadu direitu demokratiku ne'ebé hetan rekoiñesimentu internasionál iha loron 20 fulan-maiu tinan 2002, iha ne'ebé, liu ona jornada moruk ne'ebé povu maubere sente hanesan  torturasaun intimidasaun no esplorasaun ho esploitasaun iha tempu ne'ebá.

Mesmu Nune'e, povu maubere nafatin iha kompromisu hodi sakrifika-an ho konsiénsia ba prinsípiu liberta patria no liberta povu maibé to'o Timor-Leste hetan independénsia, prinsípiu liberta povu deskonsidera (nulu), no ema minoria ne'ebé hetan konfiansa ba ukun nafatin aproveita hodi goja riku soin povu maubere nian, iha povu maioria ninia sofrimentu leten.

Pozisaun KEP-MRS sei mantein kontra polítika sosa karreta ba deputadu iha kinta lijislatura ne'ebé mak Parlamentu Nasionál propoin, tanba politika ida-ne'e sai hanesan traisaun boot ida, ba povu maubere iha era independénsia.

“Tanba ne'e ami KEP-MRS Postu Uatulari, Munisípiu Vikeké, hamutuk ho povu agrikultór, negosiánte, ki'ak urbana hodi reafirma pozisaun katak ami rejeita totál politika ne'ebé nakonu ho interese pesoál, interese elite, interese partidu no interese grupu”, afirma nia.

Tuir loloos orsamentu ne'ebé ho montante boot ne'e aloka ba problema sira hanesan estrada eletrisidade, bee-moos, irrigasaun no setór sira seluk tán, ne'ebé mak povu iha munisípiu enfrenta inklui munisípiu Vikeké.

Maibé pelu kontráriu orsamentu ho montante boot ne'e, lejisladór sira mak halo fali lei ba sira-nia an hodi goja mesak iha ema barak nia sofrimentu leten.

Tanba ne'e KEP-MRS mós husu ba Prezidente Repúblika, José Manuel Ramos Horta atu tetu didi'ak Orsamentu Jerál Estadu (OJE) 2023 antes promulga.

Nune’e husu mós ba povu agrikultór, negosiánte, ki'ak urbana iha Munisipiu Vikeké, atu matan moris neon na'in ba Partidu sira ne'ebé mak ba kaer ukun nakonu ho interese pesoál, interese elite, interese partidu no interese grupu.

“Ami KEP-MRS Munisípiu Vikeké, Postu Uatulari sei la hili tan Partidu sira ne'ebé mak asentu iha Parlamentu Nasionál tantu parlamentar no opozisaun karik politika sosa karreta la kansela”, hatete nia. (*)