Vise Ministru Finansas, António Freitas, hateten, atu deside estende no implementa sensu uma-kain tuir mai ho durasaun tinan sanulu dala ida, sei hein rekomendasaun husi komisaun tekniku sensu.
"Molok deside atu estende, ita nia PM, Taur Matan Ruak, husu ekipa tékniku atu aprezenta relatoriu sensu uma-kain 2022 nia, tanba ida-ne’e sensu ba dala-ikus ho durasaun tinan-lima, sensu tuir mai ita halo iha tinan-10 dala-ida, tanba ne’e atu estende ka lae, ita hein lai rekomendasaun hosi komisaun téknika sensu nian, ne’ebé probabilidade boot estende”, dehan Vise Ministru Antonio, hafoin reuniaun semanal ho PM, iha rezidensia ofisiál Farol, tersa (11/10).
Tanba, iha Dili foin atinje de’it 87%, enkuantu haree ba kresimentu uma-kain iha Dili barak tebes, ne’ebé hein de’it rekomendasaun hosi komisaun tékniku sensu.
Nune’e, dadaun ekipa téknika husi diresaun jerál estatistika prepara ona relatoriu no rekomendasaun liga ba implementasaun sensu uma-kain 2022
"Ha'u lakohi foti uluk desizaun katak estende ou lae, maibé kestaun ne’e ha’u hato’o ona ba Ekipa Téknika hosi Diresaun Jerál Estatístika prepara hela relatóriu no mós rekomendasaun, depois mak deside iha komisaun nasionál”, nia informa
Entretantu sensu uma-kain 2022 realiza ona iha loron 05 fulan-setembru no ramata ona iha loron 05 fulan-outubru tinan 2022.
Nune'e, bazeia ba dadus provizóriu ne’ebé rejista husi sensu uma-kain no populasaun tinan 2022 nian mka, uma-kain 235.599 iha Timór laran tomak, ho totál abitante 1.290.000, ne’ebé kompostu husi mane 657.037 no feto 633.021. (*)