"Ohin Prezidente RTTL.ep, Komisiáriu ho tan asesor sira mai iha ne'e reuniaun kona-ba situasaun iha RTTL, ne'ebé sira husu ministériu tau matan ba sira, tanba relasiona ho konstrusaun uma ne'ebé agora iha, ne'e mos sira presiza halo oinsá tau material sira ne'ebé mak bainhira sira-nia konstrusaun hotu, sira tenke simu materiál," dehan Ministru Jerónimo ba www.tempotimor.com iha Gabinete MAPKomS, palasiu governu, tersa (11/10).

Ministru mos fo orientasaun ba RTTL.ep atu oinsa sira bele prepara dadauk ona BoQ, nune'e loke tenderizaun ba kompaña sira, kona-bá atu kompra sasan hirak ne'e.

Ba prosesu ne'e rasik RTTL propoin hela orsamentu ho montante rihun US$800 ba MAPKomS, maibé ida-ne'e sei trata liuhusi proposta ida atu bele uza fali osan reseita ne'ebe RTTL hetan kada fulan.

Purtantu kona-ba orsamentu ne'ebe RTTL propoin ne'e, la'os orsamentu adisional, maibé osan iha ona, hein de'it oinsá RTTL hato'o proposta ba MAPKomS, atu bele ko'alia ho Ministériu Finansa hodi bele uza.

"Fula-fulan sira-nia reseita tama hela ka la'e, entaun osan sira-ne'e jere halo didi'ak para atu sosa fali material sira ne'ebé mak objetivu," nia dehan

Alende ne’e, Ministru Asuntu Parlamentar no Komunikasaun Sosial, ohin hala'o mos enkontru ho Primeiru Ministru, Taur Matan Ruak hodi aprezenta preokupasaun RTTL nian iha tempu, tanba kada tinan edifísiu RTTL kontinua hetan inundasaun.

"Reuniaun ho Primeiru Ministru mos ami deskute oituan kona-bá RTTL nia situasaun, eh ha'u mos informa ba Primeiru Ministru kona-bá progressu ne'ebé iha RTTL nian liliu relasaun ho konstrusaun ne'ebé iha nomos kondisaun iha RTTL rasik ne'ebé oras ne'e iha, tanba atu tama tempu udan ona, ita tauk, ita hanoin hela keta halo udan bo'ot," nia afirma

Durante reuniun ho xefe governu ne'e, hala'o mos deskusaun oituan kona-ba oinsa mak haree futuru RTTL nian atu bele sai empreza públika ne'ebé di'ak no tuir ema hothotu nia hakarak.

Purtantu ko'alia kona-ba prosesu konstrusaun ba uma foun RTTL nian dadaun konsege atinje ona besik 20 pursentu. (*)