"Sé mak lakohi hetan bele entrega ba seluk, ne'e bele, purzemplu ha'u la simu, agora sé mak dehan ne'e nia lakohi ne'e entrega, sé providór lakohi, entrega ba ema ki'ak sira, ne'e mais konsiénsia, ne'e ka la'e," dehan PM Taur Matan Ruak iha Palásiu Prezidensial hafoun enkontru semanál ho Prezidente Repúblika, Kinta (06/10).
Ba kestaun ne’e, xefe governu hakle’an, “Mais ha'u haree balun ne'e ibun mak ko'alia mais foti hatama dadauk ba bolsu ne'e ka la'e, ha'u uluk prezidente, ha'u kontra Lei Pensaun Vitalisia (LPV), eh saida mak ha'u halo, h'u foti fó bolsu estudu ba joven sira, entaun sira bele halo tuir ida-ne'e, duke sira ko'alia, ita la presiza ko'alia, prátika sé ema hotu mak nia sente katak, nia iha liu kondisaun, foti fó ba ita-nia viziñu, ha'u Cesta Bázika mós ha'u la simu ne'e, duke ita ko'alia. Ema dehan hanesan ne'e, ita-nia aktu ida, ita-nia hahalok ida, vale liu fali ida ko'alia liafuan rihun ne'e,” katak PM.
Eis prezidente repúblika ne’e komenta, subsídiu $200.00 ne’ebé aplika universál ne’e, populasaun dehan injustisa no korupsaun, maibé populasaun sira mak koruptór loloos.
“Eh populasaun dehan hanesan ne'e, señor prezidente korupsaun, ha'u dehan problema ha'u nian ne'e la'os korupsaun, imi dehan boot de'it, ki'ik-oan de'it mós na'ok, ki'ik-oan nia bele fa'an nia modo tahan, nia ba sosa dolar-ida ($1) nia fahe tiha tolu, fa'an dolar-ida ($1) nafatin, ninia kopu nia fa'an iha kalen, sira tuku nia kidun sa'e tiha, ninia na'an nia ba hatama fali bee ba laran para halo todan, ne'ebé sosiedade mak koruptu, ema koruptu na'in sé? mak sosiedade," dehan Taur.
Nia mós fó ezemplu, sensus ne'ebé sosiedade sira fó ne'e númeru ida, maibé simu sasan sesta bazika ne'e ho númeru seluk, ne'e signifika iha ema balun ne'ebé utiliza eleitoral rua to'o tolu.
"Agora mai husi sé, ha'u hanoin depois de sensus remata, se Komisaun Anti Korupsaun (KAK) ho Provedoria ba Direitu Umanu no Justisa (PDHJ) ajuda governu para hetan se maka iha sesta bazika ne'e lohi para na'ok sasan, liurai, xefi ka ministru ka sé, buka ida-ne'e," nia hakotu.(*)
