Print this page

FP Kompleta Tinan 60, Governu ho PN Sei 'Hapara' Obrigatóriu

By October 07, 2022 3081
Ministru PCM, Fidelis Magalhaes Ministru PCM, Fidelis Magalhaes Foto Ofisial

Tempotimor (Dili)-Haree ba funsionamentu administrasaun públika iha governu ne’ebé lentu tebes, mak governu hamutuk ho parlamentu nasionál sei aplika reforma obrigatóriu ba funsionáriu públiku sira ne’ebé kompleta ona tinan 60.

Ministru Prezidénsia Konsellu Ministru (MPKM), Fidelis Manuel Leite Magalhães hatete, governu hein hela desizaun husi Parlamentu Nasional (PN) hodi autoriza Funsionáriu Públiku (FP) hamutuk 3.441 tama ba reforma obrigatóriu tanba kompleta ona idade 60.

"Governu mai atu aprezenta rajaun sira ba proposta lei alterasaun kona-ba idade obrigatóriu reforma, proposta ne’ebé governu pretende ne’ebé husu mai parlamentu mak atu hatún obrigatóriu idade 60 ba funsionáriu sira," Ministru Fidelis informa ba jornalista sira iha Parlamentu Nasionál, horseik (06/10).

Governante ne’e afirma, governu sei haree hela kondisaun sira ba funsionáriu públiku ne’ebé idade tama ona ba reforma obrigatoriu, hodi nune’e bele kria kondisaun dignu ba funsionáriu reformadu sira no hosi reforma ne’e loke dalan ba jerasaun foun sira, atu tama filafali iha sistema administrasaun públika nian.

Kria kondisaun ba funsionáriu reformadu sira atu nune’e governu sei la lakon respeitu no oportunidade ho dever ida kona-ba fó kondisaun ba funsionáriu hirak ne’ebé ezerse ona misaun durante tinan barak iha administrasaun públika atu bele lori sira pasa ba idade reforma.

Maibe iha mós polítika esensial sira ne'ebé governu bele halo ba funsionáriu sira ho idade 60 atu kontinua ejerse funsaun ba periode tinan lima tan, tuir nesesidade ne'ebé iha

"Karik ema ne'e ejerse funsaun ruma ne'ebé presiza duni nia skil, entaun governu bele halo desizaun esesional ruma, para bele kontinua ezerse funsaun to'o tinan lima," nia hatete.

Iha fatin hanesan Prezidente Komisaun Funsaun Públika (KFP), Faustino Cardoso hatete, dadauk  Funsionáriu Públiku (FP) hamutuk 3.441 maka identifika tama idade reforma obrigatóriu.

Atu submete sira ba reforma obrigatóriu presiza altera lei kona-ba reforma ninian. Maibé dadaun governu aprezenta ona proposta alterasaun lei ne'e iha Komisaun A, Parlamentu Nasionál ne’ebé trata asuntu Konstituisional no Justisa hodi deskute.

"Agora idade 60 anus bele tama idade reforma ka la'e ita sei hein lai, dekretu lei be governu atu defini ne'e, maibé ita kaer ba ida idozu nian ne'e signifika sira ne'e loloos goza ona reforma ho idozu," Prezidente ne’e esplika.(*)

Rate this item
(3 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items