"Ne’e mak ha'u nia ideia para koiñese no hatene de'it liafuan ruma depois loron seluk marka enkontru, tanba kada grupu iha nia istoria," dehan Horta hafoin dialogu iha Palasiu Prezidensiál, Bairo Pite, segunda (03/10).
Tanba, kada orgnizasaun sira hanesan PSHT-IKS-KORKA- Colimau 2000- Arte Ritual 77, iha problema no hanoin, filozofia di'ak ne'ebe sira bele ko'alia.
Xefe Estadu husu enkontru ida-ne'e, sai hanesan primeiru enkontru Jeral ho Arte Marsial no Arte ritual sira hotu, la'os atu halo serimonia nasional no ofisiál boot ruma, maibé ne'e enkontru ida informal no obejtivu dahuluk mak buka koinese organizasaun sira.
"Koiñese ita-bo'ot sira e depois ba oin semana-ida ka rua, halo enkontru individual kada grupu e ne'e iha formatu seluk, ne'e media la tama, ema ne'ebé la hola parte iha Grupu arte marsial ne'e lá tama, ha'u hakarak duni ko'alia kle’an haree problema," dehan Horta.
Horta hola inisativa ida-ne'e, tanba dala barak entidade iha estadu hakarak halo buat hotu-hotu hanesan soleidade boot ida, formalidade ho bandeira ho hino, ho orasaun, inklui halo diskursu oioin, maibé laiha diálogu duni, signifika la konsege tama iha abut problema sira husi GAM no GAR sira-nian.
Xefe Estadu mos sei lakohi atu rona barak, tanba eventu ida-ne’e nakloke loos, di'ak hanesan ho portugés ne'ebe hatete konstrazimentu atu ko'alia, klaru se de'it mak hakarak ko'alia, maibé la'os formatu ida para halo enkontru atu ko'alia ba abut problema ruma nian.
"Uluk ha'u nu’udar primeiru ministru, krize 2006, ha'u halo enkontru ho arte marsil sira hotu-hotu, maibé lider sira de'it mak mai, na'in hitu," nia afirma
Tuir loloos, bainhira problema ruma mosu iha rai laran, labele dehan ne'e, arte marsial de'it mak halo, tanba arte marsial ne'e ema barak nian, la'os individu nian. (*)