Print this page

Lei Traballadór Doméstiku, Komisaun D Sei Konsulta ba Públiku

Prezidente Komisaun D Trata asuntu Dezenvolvimentu no Ekonómiku, deputadu, Antónino Bianco. Prezidente Komisaun D Trata asuntu Dezenvolvimentu no Ekonómiku, deputadu, Antónino Bianco. Foto Suplay

Tempotimor (Dili)-Prezidente Komisaun D Trata asuntu Dezenvolvimentu no Ekonómiku, deputadu, Antónino Bianco, informa, sei halo konsultasaun ba opiniun públiku kona-bá Projetu Lei Traballadór Doméstiku ne'ebé kria husi Grupu Mulheres Parlamentar Timor-Leste (GMPTL).

"Ami sei halo audensia, seidauk hatene bainhira loos, tanba sei rona ema barak, tanba ida ne'e projetu lei, signifika mai husi deputadu sira no mai husi GMPTL sira, maibé depois de ami halo audensia dala uluk ho proponente sira mais sira mak dada is oituan fali, dehan ida-ne'e labele lai, entaun tenke rona ema barak, estudu komparativu tenke iha, liga ho kondisaun real ita-nian, tanba balun to'o regras internasional sira ne'ebe ke ita haree, ninia objetivu di'ak kada ema ida labele sai vítima, ema labele sai fali atan ba ema seluk ne'ebé ke patraun," dehan nia iha PN, kinta (22/09).

Tanba, atu halo lei ida, presiza liga mos ho lei trabaladór hanesan revizaun ba lei kódiku laboral, tanba ida-ne'e mos liga ba ema ne'ebé servisu no ko'alia kona-bá nivél saláriu traballador sira nian, mesmu ke ema servisu hanesan doméstiku iha uma laran.

Nune’e, haree mos ida-ne'e, tanba dadaun parte Sekretariadu Estadu Formasaun Profesionál no Empregu (SEFOPE) rasik aprezenta ona esbosu lei ida ba Komisaun D.

Aleinde ne’e, parte hotu mós sei fó hanoin atu hatama ona lei ne'e ba Ministériu Koordenador Asuntu Ekonómiku (MKAE), maibé seidauk, tanba prosesu iha governu ne'e iha rejimentu Konsellu Ministru nian ne'ebe lori tempu, tanba ministériu barak.

Entaun Komisaun D mós fó hanoin ida katak, projetu lei ne'e iha ona, maibé bele hatama sira-nia hanoin liuhusi eskrita kada artigu sira ne'ebé la'o dadauk, presiza halo parasér ba komisaun hodi halo melhoramentu ba lei ne'e.

 

Tanba, lei ne'e rasik, balun ko'alia aposta mós ba ratifikasaun Konvensaun Internasionál sira, nomós balun hanesan iha rai seluk atu aplika iha ne'e, maibé tenke haree ba kondisaun real no kultura Timor nian.

"Tanba, traballador doméstiku iha lei ne'e rasik, proposta ne'e mai husi hanoin ida ne'ebe enjeral, mundu aplika iha ne'eba, entaun aplika mós iha ita-nian," nia esplika.

Maibé, Konseitu husi lei ne'e, atu regulariza ema sira servisu iha uma ka'in sira, tantu mane ka feto, tanba ho objetivu ida atu, sé mak servisu iha uma ka'in ne'e, tenke iha kontratu, tanba trabalador domestiku tama servisu ho kontratu, felismente sira sei tama iha Institutu Nasional Serguransa Sosiál (INSS).

"Entaun siknifika regulariza tiha hotu para aban bainrua sai hanesan ne'e, kuandu loron ruma  empregador bankrota, entaun estadu nia intervensaun ne'e loos duni katak, ema ne'e traballador ne'ebá nian no ida-ne'e nian, jadi buat barak sei iha," nia hatete

Ba projetu lei refere, parte Komisaun D halo ona audénsia ho entidade rua, maibe sei halo audénsia barak liután atu bele konsulta ema hotu nia hanoin.

Projetu Lei Traballador Doméstiku iha Artigu hamutuk 30 resin, maibé Komisaun sei hola fali hanoin balun, atu fo hanoin halo definisaun, depois mak liga fali ba definisaun operasional kada artigu sira hodi justifika diretu traballador sira-nian, regalia halo nusa, feria karik halo nusa, inklui moras karik halo nusa. (*)

Rate this item
(1 Vote)
Last modified on Friday, 23 September 2022 03:24
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com