“Governu Timor-Leste liu-husi Sekretária Estadu Formasaun Profisionál no Empregu komprimitidu atu bele koopera hó governu Japaun hodi bele fó formasaun ba joven timor-oan sira no oinsá atu haruka ita nia joven ba servisu iha Japaun hodi bele hadi’a sira nia moris”, haktuir Diretór Jerál Formasaun Profisionál, Paul Alves, ne’ebé www.tempotimor.com asesu iha pájina SEFOPE-Direccao Nacional Emprego Exterior, kuarta (21/09).
Maibé, antes rekruta Kompaña CWP Global husi Japaun sei fó uluk formasaun ba joven sira ne’ebé iha intrese atu ba servisu iha Japaun.
Nune’e, ohin loron 21 fulan-setembru 2022, Sekretária Estadu Formasaun Profisionál no Empregu, Alarico de Rosario ho Diretór Jerál Formasaun Profisionál, Paul Alves, Diretór Diresaun Nasionál Empregu Exteriór Filomeno Soares hala’o ona enkontru hó prezidente kompaña CWP Global, Kon Yosuke hó ekipa husi Japaun, iha salaun SEFOPE Kaikoli, hodi ko’alia oinsá atu bele fó formasaun no rekruta joven timor-oan ba servisu.
Diretór Jerál, Paul Alves, hateten, objektivu enkontru hó prezidente kompaña CWP Global, Kon Yosuke hó ekipa husi Japaun, tanbá sira iha polítika atu fó formasaaun ba sistema operasaun bee mos no IT ninian, nune’e sira bele rekruta joven timor-oan ba hala’o servisu.
Nune’e, iha ona orientasaun atu ekipa tekniku husi SEFOPE nó mós Governu Japaun ninian atu bele halo diskusaun kona-ba termus legais balun hanesan memorandum intendimentu entre Governu Timor-Leste hó Japaun, nune’e bele fasilita, karik timor-oan ba servisu iha Japaun hó baze legál. (*)