Print this page

PR Horta ho Ekipa Aranka Ona ba Nova Iorke

Prezidente Repúblika (PR), José Ramos-Horta. Prezidente Repúblika (PR), José Ramos-Horta. Foto Suplay

Tempotimor (Dili)-Ohin loron kuarta-feira (21/09) Prezidente Repúblika (PR), José Ramos-Horta, ho nia ekipa delegasaun aranka ona ba hala'o vizita iha Nova Iorke, atu partisipa eventu Assembleia Jerál Organizasaun Nasoens Unidas (ONU) nian ba dala-77.

Tuir komunikadu imprensa ne'ebé fó sai husi Gabinete Prezidensiál katak, durante  marka prezensa iha eventu asembleia jerál ONU nian ba dala-77 iha Nova Iorke, Xefe estadu sei hato'o mós nia diskursu kona-bá estadu Timor-Leste nian.

Xefe Estadu mós sei ko’alia assuntu nasionál no sei sai hanesan relatoriu ne’ebé pozitivu ba komunidade internasionál.

“Mais ha’u nu’udar Xefe-de-Estadu, ha’u la ko’alia lori naran pessoál, maibé lori naran estadu nian, entaun ha’u-nia diskursu kuaze bele hatete, relatóriu ida Timor-Leste nian ba komunidade internasionál kona-ba progressu ké Timor-Leste halo iha páz iha seguransa iha rai laran, iha toleránsia polítika, toleránsia rekonsiliasaun Timor-Leste nian ké ita rai ida segundu maiór paíz katóliku iha mundu ho minoria musulmanu no protestante, maibé relasaun ho komunidade sira seluk di’ak teb-tebes, laiha konflitu relijiózu, laiha konflitu étniku, ne’e relatóriu ida di’ak ba mundu,” dehan Horta liuhusi komunikadu imprensa ne'ebé www.tempotimor.com asesu husi gabinete prezidensial, kuarta (21/09).

Assembleia Jerál sei ko’alia mós kona-ba situasaun iha Ukránia ne’ebé fó impaktu ba mundu, adezaun Timor-Leste ba ASEAN, Organizasaun Mundiál Komérsiu (OMK), susesu Timor-Leste iha mitigasaun no kombate ba pandemia covid-19 no seluk tan.

Durante iha Nova Iorke, Xefe Estadu mós sei hala’o enkontru bilateral ho Primeira-Ministra Nova Zelándia, Jacinta Ardern, Primeiru-Ministru Kambodia, Hun Sen, Prezidente Kosovo no juíz hosi tribunal anti-korrupsaun internasionál, Juíz Mark Wolf.

Nune'e mos sei hala'o Enkontru ho Senadór Patrick Dodson, enviadu espesiál ba rekonsiliasaun no implementasaun kona-ba deklarasaun Uluru hodi fuan no partisipa mós iha simeira altu-nível g7+ nian.

Entretantu, Xefe Estadu ho delegasaun, sei fila hikas mai Timor-Leste, iha loron 27 setembru 2022. (*)

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items