Print this page

Governu Kambodia Esforsu Suporta TL Tama ASEAN

By September 20, 2022 443
Ministru Turizmu Komersiu no Industria(MTKI), José Lucas do Carmo da Silva. Ministru Turizmu Komersiu no Industria(MTKI), José Lucas do Carmo da Silva. Foto Suplay

Tempotimor (Dili)-Ministru Turizmu Komersiu no Industria(MTKI), José Lucas do Carmo da Silva informa, governu no povu Kambodia tomak nafatin esforsu hodi suporta Timor Leste atu hola parte iha Asosiasaun Nasoens do Sudeste Asiatiku (ASEAN).

"Ohin mai atualiza informasaun ba Primeiru Ministru kona-ba foin lalais partisipa iha Kambodia, ne'ebe Timor-Leste foin dahuluk hetan konvite espesial husi Prezidensia komisaun ASEAN nia, no ha'u ba hasoru mos Primeiru Ministru Kamboja, Hun Sen, ne'ebé dadaun mós Presidente ASEAN nian ne'ebe iha ne'eba nia moos hato'o katak, povu Kambodia durante ne'e esforsu oinsa atu suporta governu no povu Timor -Leste atu hola parte iha ASEAN" Dehan Ministru José, iha Rezidensia PM Farol, Tersa (20/09).

Durante MTKI nia partisipasaun iha ne'eba hala'o mos enkontru bilaterais ho Xefi delegasaun sira husi Nasaun sira seluk no iha ne'eba hetan reasaun pozitivu tebes husi Ministru ekonomia sira hotu atu Timor-Leste hola parte iha ASEAN

"Em partikular dadaun iha sira nia lideransa atu suporta nafatin Timor-Leste atu hola parte iha ASEAN, sira reafirma tan dala ida liu husi Primeiru Ministru Kamboja, Hun Sen katak, sira sei halo esforsu tomak atu akontese iha tinan 2022 nian ne'e bele anunsia Timor nia integrasaun iha ASEAN," nia afirma

Primeiru Ministru Kamboja hato'o ba sira katak, depois Primeiru Ministru mai iha ne'e Governu Timor-Leste iha kedas medidas balun ne'ebe hatudu katak, Timor iha komitmentu boot atu integra iha ASEAN nian.

Tanba ne'e, liu husi Konsellu Ministru aloka kedas fundus ba rekrutamentu profisionais sira ne'ebe sei hola parte iha sekretariadu preparativu ASEAN nian no sei aprova lei sira ne'ebe pakote lejislativu ne'ebe asosia ho integrasaun ASEAN nian.

Nune'e mos, dadaun iha estabelesimentu ekipa traballu task force ba ASEAN nian, ida ne'e mak Ministru hato'o ba Primeiru Ministru, nune'e moos iha enkontru bilaterais ne'ebe ho delegasaun Nasoens ASEAN sira nian.

"Enkontru ne'e, ita ba sei hola parte ativu iha ne'eba, tanba ita la'os membru, ita ba iha ne'eba tuir konvite husi Prezidensia komisaun, ne'e duni ita enkontru iha ne'eba hasoru mak iha opening ita partisipa". (*)

 

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items