"Sim, hasoru malu ho primeiru Ministru ne'e ho asuntu importánte ida, mak mai hodi define loron ba lansamentu no hatur fatuk dahuluk ba konstrusaun IPB no MESSK deside loron ba lansamentu ne'e husi 26 to’o 30 setembru, portantu ha'u mai hasoru PM no PM iha Loron 26 mak disponivel hodi bele partisipa iha serimonia lansamentu ba konstrusaun IPB ne'e" dehan MESSK Longuinhos iha Rezidensia PM, Segunda (19/09).
Kompañia ne'ebé kompete hodi sai vensedor mak empreza Chonking Construction International husi Xina no orsamentu ba projetu ne’e, mai husi governu iha fundu infrastrutura ho montante millaun US$4.9.
Maske governu prepara ona fundu ho montante millaun $4,9 ba konstrusaun faze dahuluk, maibé empreza manan-na’in ne’e mai ho ninia estimasaun orsamentu $3.961.658.
“Empreza manan-na’in mak Chonking Construction International husi Xina, sira mak sei responsavel, tanba hetan ona avaliasaun hosi Komisaun Nasionál Aprovizionamentu, ne’ebé kontratu ne’e ita halo ba faze dahuluk", nia relata
Entretantu orsamentu ba faze dahuluk tuir planu sei realiza konstrusaun ba morru, estrada inklui verba seluk iha IPB nia laran ba tinan ida, hafoin ba faze daruak maka sei hahú konstrusaun ba edifísiu sala aula no biblioteka sira. (*)