"Regalias balun ne'ebé ita hetan tiha ona, ita sei la hetan, komesa 1 de janeiru, sé laiha alterasaun antes 31 de dezembru, tenke aprova alterasaun ida-ne'e, porque sé liu ida-ne'e, entaun regalias balun ita sei la hetan," dehan Prezidente Parlamentu Nasionál (PN), Aniceto Longuinhos Guterres Lopes hafoin halo anúnsiu ba pakote lei-tolu iha plenária PN, segunda (19/09).
Tanba, iha pakote lei tolu ne'e, hakarak ka lakohi tenke halo revizaun, hanesan parte ida reforma administrasaun parlamentár nian no reforma ne'e inísia nu’udar solusaun ida atu responde ba rezultadu auditória 2015-2016 husi Kámara Konta, ne'ebé ho nia relatóriu ho rekomendasaun sira no identifika hotu ona responsbilidade hotu-hotu.
Tanba ne'e, solusaun ida mak tenke altera lei estatutu deputadu ho estatutu funsionáriu Parlamentár, nomos Lei LOFAP.
Maibé, atu trata alterasaun ida-ne'e, dadauk iha ona Projetu rezulusaun PN númeru 103/V (5a) ne'ebé aprezenta husi deputadu sira atu kria Komisaun Eventuál hodi halo revizaun ba estatutu deputadu ho lei Orgnizasaun Funsionamentu Administrasaun Parlamentar (LOFAP) no estatutu funsionáriu parlamentár.
Nune’e, parte meza fó hanoin atu alterasaun ida-ne'e tenke aprova tarde liu iha dezembru antes tama ba janeiru 2023 no presizamente iha Komisaun eventuál ida ne'ebe fokus ba asuntu ida-ne'e to'o konklui alterasaun.
“Presiza Komisaun eventuál ketak ida, atu trata pakote lei ne'e nia alterasaun dala ida de'it. Ne'e mak meza fó hanoin eh iha inisiativa distintu deputadu na'in tolu, maka aprezenta projetu rezolusaun iha ne'e," nia afirma. (*)