Komunikadu Imprensa ne'ebé fó sai husi Gabinete MNEK, loron tersa (13/09) katak, iha loron 15 to’o 17 setembru, Ministra Adaljiza Magno no delegasaun sei halo vizita uluk ba sidade Washington-DC iha Kapitál EUA.
Iha vizita né'e Xefe diplomasia timoroan ne'e sei marka mós enkontru ho entidade importante-sira hanesan Vise-Sekretaria Estadu EUA, reprezentante ekipa Millennium Challenge Corporation, Espesialista Negosiadór ba Asuntus Realokasaun no sei hasoru malu mós ho ekipa Administradór-USAID.
Hafoin ida-ne'e sei ba fali sidade Nova Iorke, loron 18 to’o 25 setembru 2022, hodi partisipa iha sesaun abertura ba Debate Jerál Asembleia Jeral Nasoens Unida ba dala-77, depois sei partisipa mos enkontru altu nivel liga ho asuntu Direitu Úmanus nian.
Nune'e mós sei kontinua halo enkontru bilaterál ho Vise-Primeiru Ministru Slovenia nomós entidade altu nível sira, alende konvoka mós enkontru ba asuntu Mulitilaterál no Bilaterál sira seluk durante estadia iha sidade Nova Iorke.
Ba MNEK nia vizita traballu iha EUA ne'e, sei akompaña direta husi Ekipa Diresaun Jerál ba Asuntu Multilaterál no Rejionál-MNEK nian nune'e mós sei kontinua halo vizita traballu ba Repúblika Japaun. (*)