Estadu Fó Onra ba Tama Laka Hakoi iha Jardin Eroi

Estadu Fó Onra ba Tama Laka Hakoi iha Jardin Eroi Foto suplai

Tempotimor (Dili)-Xefe Estadu Francisco Guterres Lu Olo dekreta rekoñesimentu ba Constancio da Costa dos Santos alias Tama Laka ninia kontribuisaun ba luta libertasaun nasionál, ho nune’e deside atu hakoi saudozu Tama Laka iha Jardin Eroi, Munisipiu Likisa.

Desizaun ne’e Prezidente Repúblika fó sai liu husi dekretu Prezidensial númeru 48/2019, 6 Novembru.

Tanba ho ninia kontribuisaun durante luta ba independensia, Tama Laka iha Direitu atu hetan onra funebre no sei hakoi iha Jardim Herois da Patria Likisa.

Durante tempu okupasaun Indonezia, Tama Laka partisipa ativamente iha organizasaun klandestina.

Tama Laka partisipa iha manifestasaun hasoru Embaixadór Estadus Unidus Amerika, John Monjo iha otel Turizmu, Dili, iha tinan 1990.

Saudozu mós partisipa iha asaun manifestasaun iha 12 Novembru 1991 ne’ebé koñesidu ho Masakre Santa Kruz.

Aleinde ne’e, Tama Laka mós partisipa iha atividade klandestina hamutuk ho Asosiasaun Sosialista Timor (AST) iha Jawa, Indonezia.

Iha tinan 1997, Tama Laka lori bomba mai Timor Leste ho alvu atu harahun infra-estruturas prinsipál Indonézia ninian, maibé militár Indonézia kaer molok nia hala’o asaun. Nia hetan prizaun tinan 20 no kastigu iha prizaun Bekora.

Iha tinan 1998, Tama Laka konsege halai sai husi prizaun ba ai-laran hodi reziste hamutuk ho FALINTIL.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.