Prezidente AMP, Kay Rala Xanana Gusmão liman loos hamutuk ho portaz AMP, Taur Matan Ruak liman karuk iha sede partidu AMP, Tersa (15/05). Foto Valentino Dariel Sousa. 

DILI – Prezidente partidu Aliansa Mudansa ba Progresu (AMP), Kay Rala Xanana Gusmão husu ba Mari Alkatiri tenke kumpri nia kompromisiu politiku hodi sai ona hosi rejiaun Oe – Kusi Ambeno, tanba rezultadu eleisaun antisipada hatudu votu hosi Oe – Kusi Ambeno la to’o 20.000.

“Agora ami hein hela nia atu rezigna aan,” hatete Xanana liu hosi konferensia imprensa iha sede partidu AMP, bairo Grillo – Dili, Tersa (15/05).

Xanana esplika, Alkatiri rasik mak deklara assuntu ne’e durante periodu kampaña eleitoral katak bainhira povu Oe – Kusi Ambeno la fó votu ba partidu FRETILIN to’o 20.000 mak nia sei la ba vizita Oe – Kusi Ambeno.

Iha fatin hanesan, porta voz partidu AMP atual prezidente Partidu Libertasaun Popular (PLP), Taur Matan Ruak hatete iha kestaun rua katak Alkatiri tenke kumpri nia kompromisiu politika.

“Oe – Kusi Ambeno iha kestaun rua. Primeiru, ami nia kompromisiu eleitoral katak Mari Alkatiri tenke sai hosi Oe – Kusi Ambeno. Segundu Mari rasik mak hatete se la atinje votu 20.000 sei rezigna aan,” hatete Matan Ruak.

Entretantu iha Janeiru liuba Alkatiri deklara ba militante partidu FRETILIN iha salaun igreja Numbei, Oe – Kusi Ambeno katak bainhira la hetan votu to’o 20.000 iha Oe – Kusi nia sei la vizita ona Oe – Kusi Ambeno.

“Iha eleisaun antisipada Oe – Kusi mutlak. 18000 se la’e 20.000 votus. Se nafatin 14000 ne’e ha’u susar tebes. Ne’e ha’u atu mai fali vizita Oe – Kusi mós ha’u sei hanoin dala rua, dala tolu,” hatete Alkatiri.

Pozisaun Alkatiri iha Rejiaun Administrativu Espesial Oe – Kusi Ambeno (RAEOA) oras ne’e substitui hosi Arsenio Paixão Bano nu’udar prezidente substitutu, maibé mós nia durasaun ne’e liu ona prazu, tanba liu ona fulan ne’en (6).

Rezultadu eleisaun antisipada maske oras ne’e sei provizoriu hela maibé, kontradiz ona ho saida mak Alkatiri husu ba povu Oe – Kusi Ambeno iha tempu ne’eba, tanba partidu AMP mak manan iha Oe – Kusi Ambeno ho total votu 22,424 (58.87%), no partidu FRETILIN hetan de’it votu 10,810 (28.38%). (Oki)