“Hanesan ita hothotu hatene ona polítika nasionál externa Timor-Leste, importante no prioridade mak Indonézia ho Austrália, dezde tinan 2002, ha’u hanesan Ministru Negósiu Estranjeiru, Marí Alkatiri hanesan Primeiru Ministru, Maun Boot Xanana hanesan Prezidente Repúblika, ha’u rasik mak momentu ne’ebá rekomenda, kuandu Primeiru Ministru ho Prezidente eleitu, nasaun dahuluk ne’ebé mak ita vizita mak Indonézia no Austrália”, dehan Horta liuhusi Komunikadu Imprensa ne'ebé www.tempotimor.com, asesu husi Gabinete Prezidente Repúblika, sesta (09/09).
Tanba ne'e vizita ne'ebé hala'o ba iha Austrália, mak Prezidente Repúblika mós hala’o enkontru ho entidade oioin, atu hametin relasaun entre nasaun rua.
Tanba nu'udar Xefe Estadu rekoñese mós papel Governu Australianu nian dezde tinan 1999, hodi apoia dezenvolvimentu nasionál no fó oportunidade servisu ba timoroan sira.
Nu'udar Xefe Estadu ba enkontru mos Primeiru Ministru Austrália ho mós Ministru Negósiu Estranjeiru, Ministru Defeza ho deputadu sira haree ajenda ida klaru kona-ba Greater Sunrise, kooperasaun ekonómika ne’ebé tulun timoroan sira, hanesan bolsa estudu no traballadór ne’ebé mai iha Austrália hodi apoia diversifikasaun ekonómika. (*)