“Ha'u-nia hanoin ne'e, tenke haree ona, Primeiru Ministru nu’udar Ministru mós ba Interior tenke haree ona modus operandu iha Dili laran ne'e oinsá, labele husik de'it hanesan ne'e. Husu Responsabilidade ba Vise Ministru ne'e, hatene halo, lahatene halo, loloos ne'e kuandu hanesan ne'e ema mate fali ne'e rezigana-an (sai), lalika ona, husik ema seluk ba, ema hatene liu sira-ne'e iha xa, ne'e Primeiru Ministru mak tenke hola ona pozisaun ida-ne'e”, dehan Mandati iha sala Bankada FRETILIN, PN, kuarta (07/09).
Tanba kazu ne'ebé deskonfia sidadaun tara-an iha sala deteinsaun Komandu Munisípiu Dili, ida-ne'e hatudu ona katak Polísia Nasionál Timor-Leste hahú dezautorizadu ona inklui lakon konfiansa husi povu.
Maske situasaun ida-ne'e, PM Taur rasik ne’ebé asume mós kargu Munistru Interior husu ona deskulpa ba sidadaun hotu ligadu ho situasaun atuál ida-ne'e.
Maibé FRETILIN haree katak liafuan deskulpa ne'e ohin bele husu, nomós aban to’o bainrua mós bele husu deskulpa.
Ohin bele husu deskulpa, aban mós bele husu deskulpa, bainrua mós husu deskulpa, sá medida, porque iha-ne'e Primeiru Ministru mak kaer duni Ministru Interiór hakara tenke revê ona buat sira-ne'e lalais, purque agora situasaun kalan ema la la'o, ema tauk”, hatete nia.
Purtantu Bankada FRETILIN rasik mós kestiona maka’as Membru Govenru sira-ne'ebe lori seguransa barbarak hodi asegura an maibe povu laiha.
Tuir loloos instituisaun Polísia ne'e atu lori asegura povu ne'e maibé Ministru to'o Sekretáriu Estadu mak iha seguransa, ida-ne'e esplika tok tan saida, tanba sira sai líder mós povu mak eskolla tiha, maibé depois sai tiha líder, tauk fali Povu.
“Ita hothotu uluk oituan ga barak ita hotu halo, ita balun uluk milísia tuir maka’as liu, ohin la'o iha Dili laran la lori seguransa ida, di'ak hela, tanba saída mak Ministru ida, Sekretáriu Estadu sira lori seguransa bara-barak, dalaruma (as vezes) ita la'o hotu la di'ak, sira mak hun-ha-hun-ha, ba halo saida”, dehan nia.
Haree husi aktu membru Governu nian, halo ema mai husi liur mós haree no nota katak instituisaun seguransa la di'ak duni, tanba Ministru ida de'it mai ho seguransa, no bainhira Ministru haat ka lima halai tutuir malu, ida-ne'e bele sai trankadu iha estrada klaran, ne'ebé presiza haree buat sira-ne'e. (*)
