Ba Implementasaun Programa Governu iha povu nia le'et ho nia atividade naroman ba suku ne'e nu’udar programa prinsipál ida-ne'ebé antes ne'e MAPKOMS hala'o ona iha Suku lubuk ida iha Teritóriu Timór laran tomak.

Husi programa ida-ne'e nia prinsípiu loloos mak atu halo diálogu komunitária ho komunidade sira iha suku laran, hodi rona preokupasaun nomós bele hatene kondisaun atuál balun ne'ebé suku sira iha.

Ba programa ida-ne'e, Ministru ba Asuntu Parlamentár no Komunikasaun Sosiál, Francisco Martins Pereira Jerónimo hatete, prezensa Governu nian mai hala'o diálogu iha suku Saelari tanba hakarak mós introduz oituan Programa sira-ne'ebé Governu iha atu ajuda dezenvolve rai ida-ne'e.

“Ami mai atu ajuda ita-boot sira hodi hadi’a rai ida-ne’e sai di’ak liután tuir programa VIII Governu konstitusionál lideradu Jenerál Taur Matan Ruak,” dehan Ministru Jeronimo hafoin hala'o diálogu ho komunidade sira iha sede Suku Saelari, sesta (02/09).

Pozisaun Governu hala'o Programa ida-ne'e tanba konsidera povu mak sai alvu ba dezenvolvimentu rai ida-ne'e nian, nune'e presiza hakbesik liuhusi dalan komunikasaun hanesan diálogu komunitária atu hato’o programa ne’ebé Governu halo ona no transmite ba povu atu komprende.

Tanba ne'e liuhusi diálogu komunitária ida-ne’e hakarak intrudúz polítika no programa prioridade sira nomós atinjementu ka progresu servisu Governu daualu nian ba komunidade iha suku ida-ne'e nomós bele rona preokupasaun, difikuldade no problema ne’ebé hasoru iha baze.

Maibé diálogu ida-ne'e mós promove asesu ba informasaun iha área rurál no hakbi’it komunidade sira-nia kapasidade asesu ba informasaun no hasa’e koñesimentu kona-ba dalan progresu planu, implementasaun dezenvolvimentu iha baze inklui partisipasaun povu nian.

Ho atividade dialogu ida-ne'e, Xefe Suku Saelari, Mateus Cardoso hatete, nia parte sente kontente tanba liuhusi diálogu entre membru Governu ida ne'e sai momentu ida ne'ebé importante ba komunidade sira atu hato’o preokupasaun ne'ebé sira enfrenta iha baze, liliu Postu Administrativu Laga espesialmente iha suku Saelari.

Maibé problema ne’ebé durante sira hasoru máka infraestrutura báziku liliu estrada tanba kondisaun ba aldeia sei aat, bee-moos sei falta inklui komunidade balun seidauk asesu ba eletrisidade.

Purtantu, Suku Saelari ho totál aldeia hamutuk sua, mak hanesan Bubuloma, Lalilaidama, Larisura, Laritau, Lauhare, Riadae, Saelari, Samalanu inklui Terubala ne'ebé ho totál populasaun kuaze 2.770 no xefe família 612.

Purtantu iha atividade refere hetan partisipasaun Ekipa MAPKOMS, Francisco Jerónimo, no Ministru Asuntu Kombatente Libertasaun Nasionál, Júlio Sarmento ‘Meta Malik’, Ministru Edukasaun Juventude no Desportu (MEJD), Armindo Maia, Vise Ministru Administrasaun Estatal (MAE), Lino de Jesus Torrezão, Deputadu Cornelio Gama ‘L-7’, autoridade lokál no Komunidade sira. (*)