Vise Xefe Estadu Maiór Jeneral F-FDTL, Majór Jeneral Calisto dos Santos Coli "Coliati" hatete, dadauk Tenente Jenerál Falur lá marka prezensa iha reuniaun semanal ho Prezidente Repúblika tanba nia sei ba hala'o hela inaugurasaun ba baze militar ida iha Rejiaun Administrativa Espesiál Oekussi no Ambeno (RAEOA).

“Ha'u ohin reprezenta sua eselénsia Tenente Jenerál Falur Rate La'ek tanba Jenerál horseik konsege ba hala'o serimónia inaugurasaun ba baze militar iha Oekussi. Tanba ne'e ha'u ohin reprezenta Jenerál mai hasoru seu Prezidente Repúblika atu informa ba sua Prezidente Repúblika kona-ba situasaun iha área Militar durante fulan-agostu nia laran”, dehan Coliati hafoin finaliza audénsia ho PR Horta iha Palásiu Prezidensiál Bairo Pite, sesta (26/08).

Ba situasaun jerál ne'ebé mak konsege atualiza ba Xefe Estadu mak hanesan mídia sira hatene kona-ba situasaun seguransa inklui mós situasaun kona-ba dezenvolvimentu tropa.

“Ida-ne'e mak situasaun sira-ne'ebé atu informa ba Prezidente Repúblika”, afirma nia.

Maibé ko'alia kona-ba prosesu rekrutamentu F-FDTL nian ne'e laiha dúvida, tanba ida-ne'e hanesan matéria ida ne'ebé tékniku liu, no laiha nesesidade atu atualiza mos ba Prezidente Repúblika.

Tanba Prezidente Repúblika nu'udar komandante supremu forsa armada nian, nia so ko'alia liu kona-ba kestaun sira ne'ebé estratéjiku, no la'ós ko'alia kona-ba kestaun operasionál.

“Ida-ne'e so ita-boot sira husu ba komisaun rekrutamentu, ha'u la hola parte iha komisaun rekrutamentu, purtantu se karik iha faze finál ba rekrutamentu ida-ne'e komisaun rekrutamentu sei halo relatóriu ba komandu, kuandu relatóriu to'o ona iha komandu pois iha ne'e ha'u foin bele hatene”, hatete nia. (*)