“Difikuldade, dezafiu ke mídia enfrenta, ha'u hatete moris nian, tanba ekonomia Timor nian fraku mídia lubuk ida e mídia iha kustu ne'e, e ha'u hatete Jornalista sira kuitadu, balun hán mós difikuldade, motorizada oan ida mós tohar dadaun, at dadaun, e ne'e mak dezafiu boot. Maibé apezar de dezafiu ida-ne'e ha'u hatete sira ke parese hadomi duni sira-nia profisaun, kontinua nafatin reporter, ha'u admira ba ida-ne'e”, dehan Horta iha salaun Komisaun Nasionál ba Eleisaun sira (CNE) , Kolmera, kinta (25/08).
Maske situasaun sira-ne'e kontinua afeta atividade Jornalista sira-nian, maibé Xefe Estadu haree katak mídia sira iha Timor-Leste seidauk hasoru problema kona-ba liberdade imprensa.
Tanba ne'e, Xefe Estadu sei la ko'alia barak iha konferénsia ka fórum diálogu anuál 2022 ne'ebé organiza husi Konnsellu Imprensa maibé fó ba jornalista mak sei ko'alia barak kona-ba dezafiu oioin ne'ebé sira enfrenta.
Maibé nu’udar Xefe Estadu só temi de'it tuir instituisaun Internasionál balun, iha Bruxelas ne'ebé halo survei ba Liberdade Imprensa iha mundu, hatete Timor-Leste iha númeru 17, ne'e as liu no di'ak liu Estadu Unidus Amerika, Austrália inklui nasaun sira seluk.
Dala-ruma jornalista balun ansi atu hakerek, no bainhira hakerek loloos de'it buat ruma ne'e ema ladun interese atu haree entaun dalaruma tenke inventa buat balun.
Hanesan Ezemplu ida mak ba entrevista Ministru sira hatete ida no sira hatete buat seluk fali, ida-ne'e ema hothotu sei haree, tanba kontra versiál.
Maske situasaun ne'e rasik dalaruma akontese ba Prezidente Repúblika maibé nia la liga, tanba konsidera ema polítiku no governante sira mós dala-barak halo sala.
“Ha'u hatete ohin ne'e polítiku sira governante sira, halo mós buat barak sala, e kuandu Ministru ida halo buat balun sala, e kursu ne'e dalaruma bele milhões de dólares, e Jornalista kuandu hakerek buat ida runguranga, arbiru ou faktualmente sala, laiha impaktu ba ema ruma nia bolsu, purtantu lalika hirus estres damais kuandu jornalista hatete buat ida, hotu ita hothotu halo sala”, esplika nia. (*)
