“Mais ida-ne'e apuramento asidente ita hotu la espera mais grasa adeus maromak, matebian no ita-nia uma lisan, rai lulik sira mós proteze ita”, dehan nia iha Parlamentu Nasionál, segunda (22/08).
Maibé kona-ba motorista ne'e ko'alia kestaun konfiansa pesoál husi deputada nian, tanba iha Parlamentu Nasionál, mós laiha deputadu ida mak ninia motorista ne'e nia loke konkursu públiku mak foin rekruta ne'e la'e, maibé mioria deputadu sira mós identifika no nomeia ninia motorista bazeia ba ninia ema ne'ebe nia konfia.
“Ba ha'u rasik hanesan ohin ha'u hatete, ha'u nia motorista iha hela porsesu tranzisaun husi ida tuan ba ida foun, e ha'u iha prosesu atu identifika hela ha'u-nia motorista atu substitui ha'u-nia motorista ida agora”, haktuir nia.
Tanba ne'e informasaun ida kona-ba sirkuntansia motorista nian mós aprezenta tiha ona ba Sekretáriu Jerál Parlamentu Nasionál ho nia adjuntu iha loron 2 fulan-agostu bainhira halo plenária Komisaun Permanente iha PN ho verbalmente.
“Sira rua hatene ona asaun Administrativu saida mak ami bele foti iha ona koiñesimentu husi sira rua”, esplika nia.
Iha periodu resesu ida-ne'e mós atividade vise Prezidente PN nian mós labarak, no mai Parlamentu mós semana rua mak foin mai dala ida atu partisipa plenária Komisaun Permanente.
Nune'e iha periodu resesu ne'e kada deputadu ba fatin kontaktu eleitorál no reajustamentu, normalmente lori karreta privadu (Parlamentu Nasionál) iha fatin Postu Administrativu ne'ebé de'it, no nia la’en mak hanesan motorista temporáriu.
“Tanba se ha'u lori motorista mai mós agora dadaun ne'e semana rua mak mai dala ida iha plenária entaun ha'u dehan husik ba nia deskansa lai, 15 setembru mak nia hahú servisu efetivu”, haktuir nia.
Entaun momentu ne'e iha atividade kontaktu eleitorál ida iha Laklubar ne'ebé planeadu no ajendadu liu fulan ida liuona, tenke finaliza iha semana ida nia laran hahu 17 to'o dia 19 agostu.
Momentu ne'e laiha motorista, entaun segundu konfiansa pesoál ne'ebé Vise PPN, Maria Angelina bele nomeia mak nia kaben, atu lori karreta.
“Agora se imi imajina ha'u lori ha'u-nia kaben name digas nia iha intensaun at atu lori ami hotu ba oho iha rai naruk, ne'e puramentu asidente”, haktuir nia.
Purtantu evidénsia mak sira ba duni hasoru eleitoradu sira ho autoridade lokál sira-ne'ebe iha Laklubar, no ba mós lá uza patrimóniu Estadu atu hetan previléjiu ba sira-nia an, ka uza patrimóniu Estadu atu buka lukru merak.
Maske asume kargu públiku, maibé nia mós asume kargu doméstika hanesan inan tanba ne'e iha ensidénsia ne'e mos la'ós vise PPN mesak maibé ho nia oan rua iha laran hotu.
“Ha'u la'o loron tolu, ha'u-nia oan sira sei idade menor, 15 anos mai kraik, ha'u la'o loron tolu-haat imposivel ha'u husik sira mesak iha uma, sira tenke la'o ho para bainhira sira viajen ho ha'u, ha'u-nia konsentrasaun atu ko'alia ho povu di'ak liután, duke sira iha uma, ha'u atrapaladu se mak haree ha'u nia oan sira-nia kabun, sira-nia roupa, sira-nia haris hatais buat sira-ne'e hotu”, hatete nia.
Maibé felismente kestaun kona-ba motorista ne'e laiha deputadu ida mak nomeia motorista la'ós liuhusi rekrutamentu públiku maibé sira bazeia ba konfiansa pesoál.
“La'ós konkursu públiku mak, ema ne'ebé nia lahatene, mai lori nia karreta, tanba ami ezerse kargu públiku, ami la'ós profesionál servisu iha Organizasaun Sosiédade Sivíl, ka Ajénsia Nasaun Unida ne'ebé rekrutamentu ne'e bazeia ba profisaun la'e, ida-ne'e kargu polítiku entaun nomeasaun ba motorista mós tenke pesoál de konfiansa”, hatete nia. (*)
